کراچی: ایک جوڑے کے ہاں ایک ساتھ 5 بچوں کی پیدائش ہوئی ہے، جس پر والدین اور اہل خانہ خوشی سے نہال ہیں۔
نجی ٹی وی کے مطابق کراچی کے علاقے بلدیہ ٹاؤن میں ایک جوڑے کے ہاں شادی کے پہلے ہی سال ایک ساتھ 5 بچوں کی قبل ازوقت پیدائش ہوئی، جس نے نہ صرف والدین بلکہ ڈاکٹروں کو بھی بیک وقت حیران اور خوش کردیا۔
شہر کے نجی اسپتال میں خاتون کو ایمرجنسی کی حالت میں منتقل کیا گیا، جہاں ڈاکٹروں نے فوری سی سیکشن کے ذریعے آپریشن کیا، جس کے نتیجے میں 5 نوزائیدہ بچوں کی ولادت ہوئی۔
اسپتال انتظامیہ کے مطابق پیدائش کے وقت بچوں کا وزن نہایت کم تھا اور وہ سانس لینے میں دشواری کا سامنا کررہے تھے۔ ان کی طبیعت کو مدنظر رکھتے ہوئے انہیں انتہائی نگہداشت میں رکھا گیا ہے، جہاں وہ مسلسل ڈاکٹروں کی نگرانی میں ہیں۔
اسپتال ذرائع کا کہنا ہے کہ نوزائیدہ بچوں کی حالت میں بتدریج بہتری آرہی ہے، تاہم ان کی مسلسل نگرانی جاری رہے گی۔
