کراچی: ملک کی مقبول اداکارہ عائزہ خان نے سوشل میڈیا ایپ ٹک ٹاک کو جوائن کرلیا۔
عائزہ خان نے گزشتہ روز انسٹاگرام پر ایک مختصر ویڈیو شیئر کی جس کا آغاز ان کے گلے میں پہنے ہوئے لاکٹ سے ہوتا ہے جس پر گیتی نام لکھا ہوا ہے۔ پس منظر میں ایک بھارتی گانا چل رہا ہے۔ بنیادی طور پر یہ ایک ٹک ٹاک ویڈیو تھی جس پر عائزہ خان کا یوزر نیم ’’گیتی پرنسز‘‘ لکھا ہوا ہے۔
اس ویڈیو کے کیپشن میں عائزہ خان نے لکھا ٹک ٹاک پر گیتی پرنسز کو فالو کریں۔ اس بات سے ظاہر ہوتا ہے کہ عائزہ خان نے یہ ٹک ٹاک اکاؤنٹ اپنے نام سے نہیں بلکہ گیتی پرنسز کے نام سے بنایا ہے۔
عائزہ خان کی یہ ویڈیو شیئر ہوتے ہی سوشل میڈیا پر وائرل ہوگئی اور مختلف پیجز پر کہا جارہا ہے کہ عائزہ خان نے ٹک ٹاک اکاؤنٹ دراصل اپنے نئے پروجیکٹ کے لیے بنایا ہے جس میں وہ ’’گیتی پرنسز‘‘ نامی ٹک ٹاکر کا کردار ادا کررہی ہیں۔
View this post on Instagram
اس کے علاوہ عائزہ خان کا اس ویڈیو کو شیئر کرنے کا مقصد یہ ہوسکتا ہے کہ وہ لوگوں کو اپنے نئے کردار سے متعارف کروارہی ہیں۔ سوشل میڈیا پر اسے اپنے پروجیکٹ کی پروموشن کا طریقہ بھی قرار دیا جارہا ہے۔
تاہم عائزہ خان نے اس بارے میں مکمل خاموشی اختیار کی ہوئی ہے انہوں نے نہ تو یہ بتایا کہ انہوں نے گیتی پرنسز کے نام سے ٹک ٹاک اکاؤنٹ کیوں بنایا اور نہ ہی اپنے نئے پروجیکٹ کے بارے میں مزید کوئی تفصیل بتائی۔ عائزہ کے مداح بے چینی کے ساتھ اس سسپنس کے کُھلنے کا انتظار کررہے ہیں۔