کولمبو: سپر فور مرحلے کے اہم میچ میں ایشیا کپ کی دفاعی چیمپئن سری لنکا نے پاکستان کو سنسنی خیز مقابلے کے بعد شکست دے کر فائنل کے لیے کوالیفائی کرلیا، اس ہار کے بعد گرین شرٹس کا ٹورنامنٹ میں سفر ختم ہوگیا۔
سری لنکا نے پاکستان کا 252 رنز کا ہدف میچ کی آخری گیند پر 8 وکٹوں کے نقصان پر پورا کر لیا، کوشال مینڈس 91 رنز بناکر نمایاں رہے۔ سری لنکا کو جیت کے لیے آخری گیند پر 2 رنز درکار تھے۔
اس جیت کے ساتھ سری لنکا ایشیا کپ کے فائنل میں پہنچ گیا جہاں اس کا مقابلہ اتوار کو بھارت سے ہوگا۔
کولمبو میں کھیلے گئے ایشیا کپ کے سپر فور مرحلے کے اہم میچ میں پاکستان نے سری لنکا کے خلاف ٹاس جیت کر پہلے بیٹنگ کا فیصلہ کیا۔
پاکستان نے بارش سے متاثرہ میچ میں مقررہ 42 اوورز میں7 وکٹوں پر 252 رنزبنائے، ڈک ورتھ لوئس میتھڈ کے تحت ہدف بھی 252 رنز مقرر ہوا۔
محمد رضوان 86 رنز بناکر ناٹ آؤٹ رہے، عبداللہ شفیق نے 52 اور افتخار احمد نے 47 رنز اسکور کیے۔
پاکستان نے 27.4 اوورز کے کھیل میں5 وکٹ پر 130 رنز بنالیے تھے جب میچ کو بارش کے باعث روکا گیا تاہم کچھ دیر کھیل رُکنے کے بعد دوبارہ شروع کیا گیا اور میچ کو 45 سے 42 اوورز فی اننگز تک محدود کر دیا گیا۔
یہ میچ سیمی فائنل کی صورت اختیار کرگیا تھا، سری لنکا اور پاکستان میں سے جیتنے والی ٹیم کو ہی ایشیا کپ کے فائنل میں بھارت کا مقابلہ کرنا تھا۔
130 رنز پر پانچ وکٹیں گرنے کے بعد وکٹ کیپر بیٹر محمد رضوان اور افتخار احمد نے ذمے دارانہ بیٹنگ کی، دونوں کے درمیان 108 رنز کی بہترین شراکت داری قائم ہوئی۔
تاہم پھر افتخار احمد 40 گیندوں پر 47 رنز بناکر آؤٹ ہوئے جبکہ رضوان نے شاندار بیٹنگ کو جاری رکھا اور ٹیم کا اسکور مقررہ 42 اوورز میں 252 رنز تک پہنچایا۔
محمد رضوان 73 گیندوں پر 86 رنز بناکر ناٹ آؤٹ رہے، اس کےعلاوہ شاداب خان نے 3 اور شاہین آفریدی نے ایک رن بنایا۔
سری لنکا کی جانب سے ماتھیشا پتھیرانا 3 اور پرامود مددوشان نے 2 وکٹیں حاصل کیں۔
252 رنز کے ہدف کے تعاقب میں سری لنکا نے شروع سے ہی محتاط انداز میں بیٹنگ کی، وکٹ گرنے کے باوجود سری لنکن بیٹرز اسکور بناتے رہے۔
ہدف کے تعاقب میں سری لنکا کی پہلی وکٹ 20 رنز کے مجموعی اسکور پر گری، کوشل پریرا 17 رنز بناکر رن آؤٹ ہوئے۔
سری لنکا کو دوسرانقصان نیسنکا کی صورت میں اٹھانا پڑا، وہ 29 رنز بناکر پویلین لوٹے، تاہم 2 وکٹیں گرنے کے بعد کوشل مینڈس اور سمرا وکرما نے ذمے داری سے بیٹنگ کی اور دونوں کے درمیان 100 رنز کی شراکت داری قائم ہوئی، لیکن پھر سمرا وکرما 48 رنز بناکر آؤٹ ہوئے۔
ایسے میں کوشل مینڈس نے اچھے اسٹروکس کھیلے لیکن وہ بھی 87 گیندوں پر91 رنز بناکر افتخار احمد کی گیند پر آئوٹ ہوگئے۔ اس کے بعد پاکستان ٹیم میچ میں واپس آئی اور سری لنکا کی وکٹیں گرائیں۔
تاہم میچ کی صورت حال یہ بنی کہ سری لنکا کو 6 گیندوں پر 8 رنز درکار تھے۔
پاکستان کی جانب سے زمان خان نے آخری اوور کروایا، ان کی آخری گیند پر سری لنکا کو 2 رنز درکار تھے جو سری لنکن بیٹر اسالنکا نے اسکور کیے اور اپنی ٹیم کو میچ جتوا کر فائنل میں پہنچا دیا۔ وہ 47 گیندوں پر 49 رنز بناکر ناقابل شکست رہے۔
گرین شرٹس کی جانب سے افتخار احمد نے 3، شاہین آفریدی نے 2 اور شاداب خان نے ایک وکٹ لی۔
پاکستان کے خلاف 2 وکٹوں سے کامیابی کے بعد سری لنکا ایشیا کپ کے فائنل میں پہنچ گیا اور اب اتوار کو بھارت اور سری لنکا کا فائنل کولمبو میں کھیلا جائے گا۔