واشنگٹن: امریکی پارلیمنٹ کی امور خارجہ کمیٹی میں ری پبلکن رکن اینڈی بگس نے ایک بل پیش کیا ہے، جس میں پاکستان کی اہم اتحادی حیثیت ختم کرنے کا مطالبہ کیا گیا ہے۔
ڈان ڈاٹ کام کی خصوصی رپورٹ کے مطابق ایری زونا سے منتخب ہونے والے کانگریس کے رکن اینڈی بگس نے 117 ویں کانگریس میں پاکستان مخالف بل پیش کیا ہے۔
بل میں استدعا کی گئی کہ پاکستان کو امریکا کے ایک اہم غیر نیٹو اتحادی کی حیثیت حاصل ہے، جس کی مناسبت سے کئی مراعات کا حامل بھی ہے، تاہم اب پاکستان کی اہم اتحادی کی حیثیت پر نظرثانی کا وقت آگیا ہے۔
امریکی میڈیا میں بھی بل کی بازگشت سنی گئی اور یہ بل صدر ٹرمپ کے دور میں پاکستان سے تعلق کی پالیسی کا تذبذب کا شکار رہنے اور نومنتخب صدر جوبائیڈن کی حکومت میں بھی بے یقینی صورت حال کے امکان کو ظاہر کرتا ہے۔
اس حوالے سے واشنگٹن ٹائمز میں شائع رپورٹ میں کہا گیا ہے کہ پاکستان کے اہم اتحادی ہونے کی حیثیت کے خاتمے کا بل امور خارجہ کمیٹی میں پیش تو کردیا گیا، تاہم بل پر پیش رفت کا امکان موجود نہیں۔
ڈان ڈاٹ کام کی رپورٹ میں واشنگٹن میں خارجہ پالیسی کے ماہرین کے حوالے سے یہ بھی دعویٰ کیا گیا ہے کہ ممکنہ طور پر نومنتخب جوبائیڈن اپنی حکومت کے آغاز میں ہی پاکستان سے تعلقات میں ٹوٹ پھوٹ نہیں چاہیں گے کیوں کہ اس طرح افغان امن عمل میں مسائل پیدا ہوسکتے ہیں۔
دھیان رہے کہ امریکا اور افغان طالبان کے درمیان تاریخی امن مذاکرات میں پاکستان نے کلیدی کردار ادا کیا تھا جس کا اعتراف امریکا کی جانب سے بھی کیا گیا تھا۔
