کراچی: ٹی وی اداکارہ ماہا حسن نے کم عمری میں جنسی ہراسانی کا نشانہ بننے کا انکشاف کیا ہے۔
نجی ٹی وی کے مطابق اداکارہ ماہا حسن نے حال ہی میں ایک انٹرویو میں اپنی زندگی کے سب سے دردناک لمحے سے پردہ اٹھاتے ہوئے انکشاف کیا کہ انہیں کم عمری میں ہراسانی کا سامنا کرنا پڑا۔ ان کا کہنا تھا کہ ان سے بچپن میں نامناسب انداز میں بات کی گئی اور غلط انداز میں چُھو کر جسمانی طور پر ہراساں کیا گیا، تاہم اُس وقت وہ اتنی کم عمر تھیں کہ انہیں اندازہ نہ ہوسکا کہ یہ سب کچھ غلط اور غیر اخلاقی ہے۔
ماہا نے بتایا کہ اس واقعے نے ان کی سوچ اور اقدار کو بری طرح متاثر کیا۔ ابتدا میں وہ اپنے ساتھ ہونے والے سلوک کا جواز ڈھونڈتی رہیں اور سوچتی تھیں کہ شاید اُس شخص کو ذہنی علاج کی ضرورت ہے، تاہم وقت گزرنے کے ساتھ انہیں احساس ہوا کہ ان کے ساتھ زیادتی ہوئی ہے۔
ماہا حسن کا کہنا تھا کہ انہوں نے کبھی اس شخص کے خلاف ایف آئی آر درج نہیں کروائی، جس پر آج بھی انہیں پچھتاوا ہے کہ شاید دیگر لڑکیاں بھی اُس شخص کا نشانہ بنی ہوں۔
ماہا حسن نے بتایا کہ اس واقعے کے بعد ان کا دین سے تعلق بھی متاثر ہوا، لیکن بعد ازاں تھراپی اور نماز کے ذریعے انہوں نے ذہنی کیفیت پر قابو پایا اور اب دوبارہ ایمان کی جانب لوٹ چکی ہیں۔
