اسلام آباد: بیرسٹر فروغ نسیم وفاقی وزیر قانون و انصاف کے عہدے سے مستعفی ہوگئے۔
نجی ٹی وی کے مطابق وفاقی وزیر قانون و انصاف بیرسٹر فروغ نسیم نے اپنے عہدے سے استعفٰی دے دیا ہے اور اب وہ سپریم کورٹ میں زیر سماعت جسٹس قاضی فائز عیسیٰ ریفرنس میں وفاق کی نمائندگی کریں گے۔
اس ضمن میں بیرسٹر فروغ نسیم نے اپنے بیان میں کہا کہ وزیراعظم کی درخواست پر جسٹس قاضی فائز عیسیٰ کے خلاف صدارتی ریفرنس میں بطور وکیل پیش ہوں گا، میں کیس میں وفاق کی نمائندگی کروں گا اور اسی لیے میں نے وزیر قانون کی حیثیت سے استعفی دیا، وزیر قانون کی حیثیت سے میں نے ہمیشہ قرآن، حدیث اور آئین پاکستان کی روشنی میں فیصلے کیے، میں نے کبھی ایسا کوئی کام نہیں کیا جو قانون کی حکمرانی کے منافی ہو۔
بیرسٹر فروغ نسیم کا کہنا تھا کہ میری کسی بھی فرد، جج، بار کونسل یا وکیل کے ساتھ کوئی ذاتی مخالفت نہیں، یہاں تک کہ جسٹس قاضی فائز عیسیٰ کے ساتھ بھی کوئی ذاتی مخالفت نہیں، میں معزز عدالت میں معاونت کے لیے صرف ایک وکیل کی حیثیت سے حاضر ہوں گا۔
