لاہور: سابق ٹیسٹ کرکٹر محمد خلیل کے گھر انتہائی افسوس ناک سانحہ پیش آیا، جہاں ان کی صرف 10 ماہ کی کمسن بیٹی کرنٹ لگنے کے باعث انتقال کر گئی۔ اس المناک واقعے کی خبر سامنے آنے کے بعد کھیلوں کے حلقوں اور مداحوں میں گہرے دکھ اور افسوس کی لہر دوڑ گئی۔
محمد خلیل نے واقعے کی تصدیق کرتے ہوئے بتایا کہ ان کی ننھی بیٹی گھر میں پیش آنے والے ایک حادثے کے دوران کرنٹ لگنے سے جانبر نہ ہوسکی۔ انہوں نے کہا کہ یہ ان کے خاندان کے لیے ناقابلِ بیان صدمہ ہے اور وہ اس دکھ کی گھڑی میں انتہائی غم زدہ ہیں۔
سابق ٹیسٹ کرکٹر کے مطابق وہ امریکا میں موجود تھے کہ انہیں اپنی بیٹی کے حادثے کی اطلاع ملی۔ خبر ملتے ہی انہوں نے فوری طور پر پاکستان واپسی کا فیصلہ کیا تاکہ اپنے اہلِ خانہ کے ساتھ اس مشکل وقت میں موجود رہ سکیں۔
محمد خلیل نے مزید کہا کہ یہ ایک انتہائی بدقسمت حادثہ تھا، جس نے ان کے پورے خاندان کو غم میں مبتلا کردیا ہے۔ واقعے کے بعد اہلِ خانہ، عزیز و اقارب، کرکٹ شخصیات اور مداحوں کی جانب سے محمد خلیل اور ان کے خاندان سے دلی ہمدردی اور تعزیت کا اظہار کیا جارہا ہے جب کہ ننھی بچی کی مغفرت اور اہلِ خانہ کے لیے صبر جمیل کی دعائیں بھی کی جا رہی ہیں۔
