کراچی: ڈپٹی کمشنر ضلع شرقی نصراللہ عباسی اور اسسٹنٹ کمشنر ریونیو ضلع شرقی محمد نواز گھمرو کی ہدایات پر پرووینشل ٹوبیکو کنٹرول سیل سندھ کے زیرِ اہتمام منگل کو ایپ ٹیک لرننگ انسٹی ٹیوٹ، شاہراہِ فیصل میں تمباکو اور نکوٹین کے مضر اثرات سے متعلق آگاہی سیشن کا انعقاد کیا گیا۔
سیشن کا آغاز ایپ ٹیک شاہراہِ فیصل کے ایڈمن منیجر محمد طیب کے استقبالیہ خطاب سے ہوا۔ انہوں نے پرووینشل ٹوبیکو کنٹرول سیل سندھ کی ٹیم اور طلبہ کا خیرمقدم کرتے ہوئے آگاہی پروگرام کی اہمیت اور نوجوانوں کو تمباکو اور نکوٹین مصنوعات کے نقصانات سے آگاہ کرنے کے مقصد پر روشنی ڈالی۔
پرووینشل ٹوبیکو کنٹرول سیل سندھ کے ڈویژنل کوآرڈی نیٹر بلال ظفر نے سیشن کی میزبانی کرتے ہوئے سگریٹ نوشی، ویپنگ، شیشہ، نکوٹین پاؤچز اور گٹکے کے انسانی صحت پر مرتب ہونے والے مضر اثرات پر تفصیلی پریزنٹیشن دی۔
انہوں نے کہا کہ یہ مصنوعات بالخصوص نوجوان نسل کی صحت کے لیے انتہائی نقصان دہ ہیں اور نکوٹین کی لت اکثر منشیات کے استعمال کی جانب پہلا قدم ثابت ہوتی ہے۔
انہوں نے طلبہ پر زور دیا کہ وہ جدید طرز کی نکوٹین مصنوعات، جنہیں مختلف دلکش ذائقوں اور انداز میں فروخت کیا جاتا ہے، جیسے ویپس، ای سگریٹس اور نکوٹین پاؤچز کے استعمال سے گریز کریں۔
انہوں نے بتایا کہ ضلع شرقی کی انتظامیہ تمباکو نوشی کے خلاف آگاہی مہمات کے ساتھ ساتھ تمباکو نوشی کی روک تھام کے قوانین پر سختی سے عمل درآمد بھی یقینی بنارہی ہے، تاکہ آنے والی نسلوں کو تمباکو اور نکوٹین کے مضر اثرات سے محفوظ رکھا جاسکے۔
سیشن کے دوران طلبہ کو ترغیب دی گئی کہ وہ اپنے دوستوں، تعلیمی اداروں اور کمیونٹیز میں آگاہی پھیلانے میں فعال کردار ادا کریں اور ایک صحت مند اور خوشحال معاشرے کے قیام کے لیے جاری کوششوں کا حصہ بنیں۔
سیشن میں طلبہ اور اساتذہ کی بڑی تعداد نے شرکت کی اور ضلع شرقی کی انتظامیہ اور پرووینشل ٹوبیکو کنٹرول سیل کی جانب سے جاری آگاہی اقدامات کی بھرپور حمایت کا عزم ظاہر کیا۔
تقریب کے اختتام پر ایپ ٹیک انسٹی ٹیوٹ شاہراہِ فیصل کے سینٹر ہیڈ وسیم اقبال نے نوجوانوں میں تمباکو نوشی سے متعلق شعور اجاگر کرنے کی خدمات کے اعتراف میں ڈویژنل کوآرڈی نیٹر پرووینشل ٹوبیکو کنٹرول سیل کو یادگاری شیلڈ اور گلدستہ پیش کیا۔
