بنوں: میرانشاہ روڈ پر مسلح افراد کے حملے میں اسسٹنٹ کمشنر شمالی وزیرستان سمیت 4 افراد شہید ہوگئے۔
پولیس کے مطابق بنوں میں میرانشاہ روڈ فلور ملز کے قریب مسلح افراد نے پولیس گاڑی پر حملہ کیا، نامعلوم مسلح ملزمان زخمی پولیس اہلکاروں سے اسلحہ بھی لے گئے۔
پولیس نے ابتدائی طور پر بتایا کہ مسلح افراد کے حملے میں 2 پولیس اہلکاروں سمیت 3 افراد جاں بحق اور 2 پولیس اہلکار زخمی ہوئے۔
اس حوالے سے اسسٹنٹ کمشنر بنوں نے حملے کی تصدیق کرتے ہوئے بتایا کہ اسسٹنٹ کمشنر شمالی وزیرستان کی گاڑی پر حملہ کیا گیا، فائرنگ سے 2 پولیس اہلکار اور ایک ڈرائیور زخمی بھی ہوا۔
اسسٹنٹ کمشنر بنوں نے بھی تصدیق کی کہ حملہ آور پولیس اہلکاروں سے اسلحہ چھین کر لے گئے، حملے میں اسسٹنٹ کمشنر شمالی وزیرستان شاہ ولی اللہ اور 2 پولیس اہلکاروں سمیت 4افراد شہید ہوئے۔
