کراچی: ملک بھر میں مہنگائی کی نئی لہر کے دوران سونے کی قیمتوں میں تاریخی اضافہ دیکھنے میں آیا ہے۔ پاکستان کی تاریخ میں پہلی مرتبہ فی تولہ سونے کی قیمت 4 لاکھ روپے کی حد عبور کر گئی ہے، جو معیشت کے لیے ایک اہم اور تشویش ناک اشارہ تصور کیا جارہا ہے۔
آل پاکستان صرافہ جیمز اینڈ جیولرز ایسوسی ایشن کے مطابق سونے کی فی تولہ قیمت میں آج 5900 روپے کا غیر معمولی اضافہ ریکارڈ کیا گیا، جس کے بعد اس کی نئی قیمت 4 لاکھ 3600 روپے ہوگئی ہے۔ یہ پاکستان میں سونے کی تاریخ کی بلند ترین سطح ہے۔
اسی طرح، 10 گرام سونے کی قیمت میں بھی نمایاں اضافہ ہوا ہے، جو 5058 روپے کے اضافے کے ساتھ 3 لاکھ 46 ہزار 21 روپے پر پہنچ گئی ہے۔ یہ اعداد و شمار نہ صرف زیورات خریدنے والے صارفین بلکہ سرمایہ کاروں اور معاشی تجزیہ کاروں کے لیے بھی حیران کن ہیں۔
سونے کی قیمتوں میں یہ اضافہ صرف پاکستان تک محدود نہیں بلکہ بین الاقوامی سطح پر بھی اس قیمتی دھات کی قیمت میں نمایاں اضافہ دیکھنے میں آیا ہے۔ عالمی مارکیٹ میں فی اونس سونا 59 ڈالر کے اضافے کے بعد 3818 ڈالر فی اونس تک جا پہنچا ہے، جو گزشتہ کئی ماہ کی بلند ترین سطحوں میں شمار کی جا رہی ہے۔
معاشی ماہرین اس غیر معمولی اضافے کی وجہ روپے کی قدر میں کمی، عالمی اقتصادی بے یقینی صورت حال اور محفوظ سرمایہ کاری کے طور پر سونے کی بڑھتی ہوئی طلب کو قرار دے رہے ہیں۔ ان کے مطابق اگر موجودہ رجحان برقرار رہا تو آنے والے دنوں میں سونے کی قیمتیں مزید بلند ہو سکتی ہیں۔
دوسری جانب عام شہری، خصوصاً شادیوں کے سیزن میں زیورات کی خریداری کرنے والے افراد اس شدید مہنگائی پر سخت پریشان نظر آتے ہیں۔ کئی افراد نے اس قیمت کو "ناقابلِ برداشت” قرار دیا ہے جب کہ صرافہ بازار کے دکان دار بھی قیمتوں کے اس غیر یقینی اتار چڑھاؤ سے پریشان دکھائی دیتے ہیں۔
