پاکستان اور یو اے ای کے درمیان مقابلہ ہوگا، ٹیم اسٹیڈیم روانہ

دبئی: ایشیا کپ میں میچ ریفری کے تبدیلی کے معاملے پر ڈیڈلاک ختم ہوگیا اور اب پاکستان اور یو اے ای کے درمیان میچ ہوگا۔
پاکستان اور یو اے ای کے درمیان آج دبئی اسٹیڈیم میں میچ پاکستانی وقت کے مطابق شام ساڑھے 7 بجے کھیلا جانا تھا، تاہم میچ ریفری کے تبدیلی کے معاملے پر ڈیڈلاک ختم ہوگیا۔
جس کے بعد پاکستان اور یو اے ای کے درمیان آج کھیلے جانے والا میچ ایک گھنٹہ آگے بڑھادیا گیا اور اب میچ ساڑے 8 بجے کھیلا جائے گا۔
چیئرمین پی سی بی نے بیان جاری کرتے ہوئے کہا کہ پاکستانی ٹیم کو اسٹیڈیم جانے کا کہہ دیا گیا ہے، جس کے بعد پاکستان کرکٹ ٹیم بس میں سوار ہوکر اسٹیڈیم کے لیے روانہ ہوگئی۔
اس سے قبل ترجمان پی سی بی عامر میر کا کہنا تھا کہ بات چیت چل رہی ہے، پاکستان اور یو اے ای کے میچ کا وقت ایک گھنٹہ آگے بڑھادیا گیا ہے۔
ترجمان پی سی بی کے مطابق محسن نقوی کی نجم سیٹھی اور رمیز راجہ سے مشاورت جاری ہے، کوشش ہے کہ اچھی خبر سامنے آئے تو چیئرمین پی سی بی سب کو آگاہ کریں گے۔
اس سے قبل پاکستان کرکٹ ٹیم کی ہوٹل سے اسٹیڈیم روانگی روکی گئی تھی۔
پاکستان کرکٹ ٹیم کو ہوٹل میں رکنے کا کہا گیا، کرکٹ ٹیم کے کھلاڑیوں کو اپنے کمروں میں جانے کی ہدایت کی گئی۔
ذرائع کا کہنا تھا کہ میچ ریفری اینڈی پائی کرافٹ کی معذرت کی صورت میں معاملہ ختم ہوسکتا تھا۔
واضح رہے کہ پاکستان کرکٹ بورڈ کو اینڈی پائی کرافٹ کو ہٹانے کے معاملے پر آئی سی سی کا کوئی جواب موصول نہیں ہوا۔
ذرائع کا اس حوالے سے کہنا تھا کہ ریفری تبدیلی کی تصدیق نہ ہوئی توپاکستان ٹیم اسٹیڈیم روانہ نہیں ہوگی۔