کراچی: شہر قائد میں کل سے بارش کا امکان ہے، ملک بھر میں مون سون بارشیں جاری ہیں اور کل سے کراچی میں بھی بادل برسنے کی توقع ہے۔
موسمیاتی تجزیہ کار کے مطابق کراچی میں 19 سے 21 جولائی کے دوران بارش کا امکان ہے، کل سہ پہر یا شام میں شہر کے اطراف گرج چمک کے بادل بن سکتے ہیں۔
موسمیاتی تجزیہ کار نے بتایا کہ بارش برسانے والا سسٹم بھارت کے جنوب مغربی اترپردیش میں موجود ہے اور یہ سسٹم راجستھان کی جانب بڑھ رہا ہے۔
موسمیاتی تجزیے کے مطابق یہ سسٹم آج شام یا رات سندھ پر اثرانداز ہوگا، سسٹم مغرب کی جانب بڑھا تو کراچی سمیت سندھ میں تیز بارش ہوسکتی ہے جب کہ کراچی میں معتدل بارش کا بھی امکان ہے۔
