لکھنؤ: بھارتی ریاست اتر پردیش، ہردوئی میں ایسا انوکھا دھوکا سامنے آیا جس نے پولیس کو بھی انگشت بدنداں ہونے پر مجبور کردیا۔
میڈیا رپورٹس کے مطابق 3 خواتین پر مشتمل ایک شاطر گینگ نے 13 سے زائد نوجوانوں سے فرضی شادیاں کیں اور انہیں لوٹ کر یہ گینگ فرار ہوگیا۔
نیرج گپتا نے شکایت درج کرائی کہ پرمود نامی شخص اسے اپنی پوتی پوجا سے شادی کروانے کے بہانے ہردوئی رجسٹرار آفس لے گیا، جہاں اس کی شادی پوجا سے انجام پائی۔
شادی کے بعد نیرج نے نقد رقم اور زیورات اپنی نئی نویلی دلہن کے سپرد کر دیے جس کے بعد دلہن پوجا اور اس کا نام نہاد دادا پرمود غائب ہو گئے۔
ہردوئی پولیس نے کارروائی کرتے ہوئے پوجا عرف سونم، آشا عرف گڈی اور سنیتا کو گرفتار کرلیا اور ان کے قبضے سے زیورات اور نقد رقم برآمد کرلی۔
پولیس کی تفتیش کے دوران انکشاف ہوا کہ یہ خواتین پورے یوپی میں غیر شادی شدہ نوجوانوں کو نشانہ بناتی اور شادی کے بہانے قیمتی سامان ہتھیا کر فرار ہوجاتی ہیں۔
