لندن: پاکستانی ڈراموں کی صف اول کی اداکارہ ہانیہ عامر نے ایک بار پھر پاکستان کا نام روشن کردیا۔ اس بار ان کی غیر معمولی صلاحیتوں کا اعتراف کسی اور نے نہیں بلکہ برطانوی پارلیمنٹ نے کیا ہے۔
ہانیہ عامر کو برطانیہ کی پارلیمنٹ میں ریکوگنیشن ایوارڈ سے نوازا گیا، جو ان کی شاندار فنی خدمات اور پاکستانی ثقافت کو عالمی سطح پر متعارف کرانے کے لیے دیا گیا۔
انسٹاگرام پر سب سے زیادہ فالوورز رکھنے والی پاکستانی اداکارہ ہانیہ عامر نے ایک اور بڑا کارنامہ سرانجام دیا ہے۔ برطانوی پارلیمنٹ میں منعقدہ تقریب میں ہانیہ کو یہ اعزاز دیتے ہوئے پارلیمنٹ کے اراکین نے ان کی محنت اور کامیابیوں کو سراہا۔
ہانیہ کے چہرے پر تقریب کے دوران نظر آنے والی خوشی اور جذبات دیدنی تھے۔ ایک ویڈیو میں جب ان کے لیے تعریفی کلمات بولے جارہے تھے، تو ہانیہ نے مسکراتے ہوئے کہا، میں نے اپنی زندگی میں اتنی تعریفیں کبھی نہیں سنیں۔ میری صرف یہی خواہش ہے کہ میں پاکستان کا نام روشن کرتی رہوں اور اپنے مداحوں کو انٹرٹین کرتی رہوں۔
ہانیہ نے یہ ایوارڈ پاکستان اور اس کے عوام کے نام کیا۔ انہوں نے کہا کہ یہ اعزاز درحقیقت ان کی ٹیم اور لاکھوں مداحوں کا ہے، جن کے بغیر یہ کامیابی ممکن نہ ہوتی۔
اس تقریب میں شریک مختلف عالمی شخصیات نے بھی ہانیہ کی فنی خدمات اور پاکستانی ثقافت کو عالمی سطح پر متعارف کرانے کے لیے ان کی تعریف کی۔ یہ ایوارڈ ہانیہ عامر کی کامیابیوں کا ایک اور سنگ میل ہے، جس نے انہیں عالمی سطح پر مزید شہرت بخشی ہے۔
ہانیہ کی اس کامیابی پر سوشل میڈیا پر ان کے مداحوں نے جوش و خروش کا مظاہرہ کرتے ہوئے ان کے لیے نیک تمناؤں کا اظہار کیا۔