ایسا کوئی کام نہیں کرنا چاہتی جس سے مداح مایوس ہوں، سارہ خان

کراچی: معروف اداکارہ سارہ خان نے ٹی وی اسکرین پر ڈانس نہ کرنے کی وجہ بتا دی۔
اداکارہ سارہ خان کئی سُپرہٹ ڈراموں میں اپنی شاندار اداکاری کے جوہر دکھا چکی ہیں، اُن کے ڈرامے ناصرف پاکستان بلکہ بھارت اور بنگلادیش میں بھی بہت مقبول ہوتے ہیں۔
جہاں سارہ خان کی اداکاری کے مداح گرویدہ ہیں وہیں وہ اُن کے معصوم چہرے اور خوبصورت مسکراہٹ کے بھی دیوانے ہیں، اداکارہ اکثر سوشل میڈیا پر اپنی تصاویر پوسٹ کرتی ہیں جنہیں مداحوں کی جانب سے بہت پسند کیا جاتا ہے۔

اب سوشل میڈیا پر سارہ خان کے انٹرویو کا مختصر ویڈیو کلپ وائرل ہورہا ہے جس میں اُنہیں ٹی وی اسکرین پر ڈانس نہ کرنے کے بارے میں بات کرتے ہوئے دیکھا جاسکتا ہے۔
سارہ خان نے کہا کہ میں ٹی وی اسکرین یا کسی ایوارڈ شوز میں ڈانس نہیں کرتی، مداحوں نے مجھے کبھی بھی ڈانس کرتے ہوئے نہیں دیکھا۔
انہوں نے کہا کہ میرے مداح مجھ سے بہت پیار کرتے ہیں، وہ میرے ڈراموں، میرے کردار اور میرے ملبوسات کی وجہ سے مجھے پسند کرتے ہیں۔
اُنہوں نے کہا کہ میں اپنے مداحوں کی پسند، ناپسند کا خیال رکھتی ہوں، میں کبھی ایسا کوئی کام نہیں کرنا چاہتی کہ جس کی وجہ سے میرے مداح مایوس ہوں یا اُنہیں میرے کسی عمل سے تکلیف ہو۔
سارہ خان نے مزید کہا کہ یہی وجہ ہے کہ میں نے کبھی ٹی وی اسکرین پر ڈانس نہیں کیا اور مجھے اُمید ہے کہ میں کبھی مستقبل میں بھی اسکرین پر ڈانس نہیں کروں گی۔
خیال رہے کہ سارہ خان اور گلوکار فلک شبیر سال 2020 میں شادی کے بندھن میں بندھے تھے جبکہ سال 2021 میں ان کے ہاں بیٹی کی پیدائش ہوئی تھی۔