لاہور: پاکستانی فلموں کی سینئر اداکارہ ریشم کا کہنا ہے کہ ڈرامہ نگار خلیل الرحمٰن قمر کو جب وائرل ہونا ہوتا ہے تو وہ انٹرویوز میں بیٹھ کر اداکاروں کے خلاف بیان دینا شروع کردیتے ہیں۔
اداکارہ ریشم نے ایک انٹرویو کے دوران کہا کہ میں اس مصنف کے بارے میں بات نہیں کرنا چاہتی لیکن یہ ضرور کہوں گی کہ اب اُنہیں دوسروں پر تنقید کرنا چھوڑ دینا چاہیے۔
ریشم نے کہا کہ خلیل الرحمٰن کو اپنی صحت پر توجہ مرکوز کرنی چاہیے، میں نے اُن کے حالیہ انٹرویوز دیکھے ہیں، جن میں اُن کی صحت خراب نظر آرہی تھی، اب اُن کے چہرے پر بھی پہلے جیسی رونق نہیں رہی۔
انہوں نے کہا کہ خلیل الرحمٰن قمر بالکل بدل گئے ہیں، وہ پہلے ایک خوبصورت آدمی تھے، ہم نے ہمیشہ سنا ہے کہ اندرونی خوبصورتی آپ کی ظاہری شکل کو بڑھا دیتی ہے لیکن اگر آپ لوگوں پر تنقید کریں گے تو بدصورت ہی نظر آئیں گے۔
اُنہوں نے کہا کہ میرے چہرے پر جو تھوڑی بہت ترو تازگی اور خوبصورتی ہے یہ میرے لنگر (خیرات) کی وجہ سے ہے، میرے اس نیک عمل سے اللہ تعالیٰ بھی خوش ہوتے ہیں۔
ریشم نے کہا کہ خلیل الرحمٰن قمر نے حال ہی میں نعمان اعجاز کے بارے میں نامناسب الفاظ استعال کیے، مجھے یہ سُن کر بہت بُرا لگا کہ ہمارے ڈرامہ نگار کس طرح پاکستان کے لیجنڈری اداکار نعمان اعجاز کو بُرا بھلا کہہ رہے ہیں۔
ریشم نے کہا کہ نعمان اعجاز ایک شاندار اداکار ہیں، ہمیں اس بات کو قبول کرنا چاہیے اور ان کا احترام کرنا چاہیے۔ میں نے بھی نعمان اعجاز کے ساتھ کام کیا ہے اور میرا تجربہ شاندار رہا، وہ میرے منہ بولے بھائی ہیں۔
اُنہوں نے مزید کہا کہ خلیل الرحمٰن ایک چالاک لکھاری ہیں جو خبروں میں آنے کے لیے جان بوجھ کر اداکاروں کے خلاف بات کرتے ہیں، وہ شہرت حاصل کرنے اور سوشل میڈیا پر وائرل ہونے کے لیے ماہرہ خان، صبا قمر اور نعمان اعجاز جیسے بڑے اداکاروں کے خلاف بیان دیتے ہیں۔
خیال رہے کہ گزشتہ دنوں نجی ٹی وی چینل کو دیے گئے انٹرویو میں خلیل الرحمٰن قمر نے کہا تھا کہ نعمان اعجاز ایک گھٹیا آدمی ہیں، پوری دنیا میں صرف نعمان اعجاز ہیں جن سے اُنہیں نفرت ہے باقی لوگوں پر غصہ آتا ہے لیکن نفرت کسی سے نہیں ہے۔
