قاہرہ: مصر سے تعلق رکھنے والے فلکیاتی ادارے جیوفزیکل ریسرچ نے دعویٰ کیا ہے کہ عیدالاضحیٰ 16 جون کو ہونے کا قوی امکان ہے۔
رمضان المبارک کا مقدس مہینہ رخصت ہوچکا اور اب دنیا بھر کے مسلمان اسلامی کیلنڈر کے آخری مہینے ذی الحجہ کا بے چینی سے انتظار کررہے ہیں۔
ذی الحجہ میں فریضۂ حج کی ادائیگی کے لیے دنیا بھر سے مسلمانوں کی بڑی تعداد مکہ معظمہ پہنچتی ہے اور اس ماہ میں سال کی دوسری عید مذہبی جوش و خروش کے ساتھ منائی جاتی ہے۔
عرب میڈیا کے مطابق مصر میں وزارت اعلیٰ تعلیم اور سائنسی تحقیق کے قومی ادارہ برائے فلکیات کی جانب سے جاری بیان میں کہا گیا ہے کہ یکم ذی الحجہ 7 جون بروز جمعے کو ہوگی۔
بیان میں کہا گیا کہ ماہ ذی الحج 1445ھ کا نیا چاند سورج غروب ہونے کے بعد سے مکہ معظمہ کے آسمان پر 11 منٹ اور قاہرہ میں 18 منٹ تک رہے گا۔
مصر کے فلکیاتی ادارے کے بیان میں مزید کہا گیا کہ اس حساب سے وقوف عرفہ 15 جون اور عید الاضحیٰ 16 جون کو ہوگی، تاہم سعودی عرب کی طرف سے عید الاضحیٰ کا چاند نظر آنے کے اعلان کے بعد ہی حتمی رائے قائم کی جاسکتی ہے۔
