سال نو پر ہوائی فائرنگ سے متعدد زخمی، والدین نے اکلوتا بیٹا کھودیا

کراچی: سال نو پر شہر کے مختلف علاقوں میں ہوائی فائرنگ سے ساتویں جماعت کا طالب علم جاں بحق جب کہ خواتین اور بچوں سمیت 18 افراد زخمی ہوگئے۔
رات 12 بجتے ہی شہر بھر میں ہوائی فائرنگ کا سلسلہ شروع ہوگیا، لگ بھگ 20 منٹ تک شہر کے مختلف علاقوں میں دھماکوں اور فائرنگ کی آوازیں آتی رہیں۔
شہریوں نے پولیس افسران و انتظامیہ کی جانب سے سالِ نو کے موقع پر ہوائی فائرنگ کی پابندی کو ہوا میں اُڑادیا۔ پولیس کے انتظامات دھرے کے دھرے رہ گئے۔
خواجہ اجمیر نگری تھانے کے علاقے نارتھ کراچی سیکٹر فائیو بی ون میں مکان کے دروازے پر کھڑا 12 سالہ لڑکا علی رضا ولد شاہد اندھی گولی سر پر لگنے سے شدید زخمی ہو گیا جسے فوری پہلے قریبی اور بعدازاں جناح اسپتال منتقل کیا گیا جہاں وہ دوران علاج دم توڑ گیا۔
مقتول علی رضا ساتویں جماعت کا طالب علم اور والدین کا اکلوتا بیٹا تھا۔ مقتول کے والد درزی کا کام کرتے ہیں ، لڑکے کے غم زدہ والد شاہد اور ماموں نے بتایا کہ گھر میں نئے سال کی آمد کے موقع پر کیک کاٹا جارہا تھا، ان کا لخت جگرعلی رضا کیک کھاتے ہوئے گھر کے دروازے پر جاکر کھڑا ہوگیا۔
اسی دوران والد اورپانچ سالہ بہن بھی پیچھے آگئی۔ والد اور بہن گھر کے باہر چبوترے پر بیٹھ گئے جب کہ علی رضا گھر کے دروازے پر ہی کھڑا ہوا تھا کہ اچانک گلی میں بچے پٹاخے چلانے لگے اوراسی دوران ایک اندھی گولی علی رضا کوبھی لگ گئی جس کے باعث وہ زمین پر گر گیا اوراس کے سر سے خون بہنے لگا۔
علی رضا کو پہلے قریبی اسپتال اور پھر جناح اسپتال منتقل کیا گیا جہاں وہ دوران علاج دم توڑ گیا۔
انہوں نے بتایا کہ اسپتال میں ایکسرے رپورٹ میں معلوم ہوا علی رضا کو سر میں گولی لگی، مقتول علی رضا کے والد نے شہریوں سے اپیل کی کہ سال نو کے موقع پر ہوائی فائرنگ کرنے سے اجتناب کریں، آپ کا شوق پورا ہوگیا لیکن اس شوق میں ان کا لخت جگر اس دنیا سے چلا گیا اب وہ کیا کریں گے۔
مقتول علی رضا کے والد نے پولیس اور دیگر قانون نافذ کرنے والے اداروں سے مطالبہ کیا کہ ان کے بیٹے کے قتل میں ملوث افراد کو گرفتار کرکے انہیں کیفرکردار تک پہنچایا جائے۔
ادھر کورنگی ، ناصر کالونی میں ہوائی فائرنگ سے 25 سالہ محمد سرور، سی ویو پر 28 سالہ عطاء اللہ، گرومندر کے قریب 12 سالہ چیتن ،عزیز آباد نمبر9 کے قریب 25 سالہ عصمت، نارتھ ناظم آباد میں 12 سالہ اقرا، گھاس منڈی کے قریب 14 سالہ حارث، عائشہ منزل کے قریب 16 سالہ فصیحہ، عزیز آباد میں 46 سالہ محمد سلطان، لیاقت آباد فلائی اوور پر 55 سالہ محمد اکرم، پرفیوم چوک کے قریب 9 سالہ فاروق، معصوم شاہ کالونی میں 25 سالہ شبیر، صدر زینب مارکیٹ کے قریب 45 سالہ رضوان، کورنگی مدینہ کالونی میں 30 سالہ عبداللہ، ملیر سٹی میں 27 سالہ ریحان احمد، بھٹائی آباد میں 40 سالہ خاتون نذیراں، برنس روڈ کے قریب 18 سالہ محمد اکمل، لانڈھی زمان آباد میں 25 سالہ امتیاز اور واٹر پمپ چورنگی کے قریب فیصل زخمی ہو گیا۔

جواب شامل کریں

آپ کا ای میل ایڈریس شائع نہیں کیا جائے گا۔