اسلام آباد: لائن آف کنٹرول کی خلاف ورزیوں پر پاکستان کا بھارتی سفارت خانے کے ناظم الامور کو دفتر خارجہ طلب کرکے شدید احتجاج ۔
ڈی جی ساؤتھ ایشیا زاہد حفیظ چودھری نے بھارتی ناظم الامور گرو اہلوالیا کو طلب کیا اور شدید احتجاج ریکارڈ کرایا۔ بھارت نے گزشتہ روز دودھنیال، رکھ چکری، چڑی کوٹ اور بروھ سیکٹرز پر شدید فائرنگ کی تھی جس سے ایک بچہ شہید اور چار شہری شدید زخمی ہوئے تھے۔
ترجمان دفتر خارجہ عائشہ فاروقی کی جانب سے جاری بیان میں کہا گیا ہے کہ انڈین آرمی کی طرف سے شہری آبادی پر مارٹر گولے، بھاری توپ خانہ اور خودکار اسلحہ کا استعمال کیا جا رہا ہے۔ترجمان کے مطابق بھارتی فوج 2003ء سیز فائر معاہدے اور بین الاقوامی انسانی حقوق کی مسلسل خلاف ورزی کر رہی ہے۔ قابض بھارتی فوج نے رواں سال 549مرتبہ ایل او سی کی خلاف ورزی کی۔
عائشہ فاروقی کا کہنا تھا کہ بھارتی اقدامات علاقائی امن وسلامتی کے لیے شدید خطرہ ہیں، کشیدگی بڑھا کر بھارت مقبوضہ کشمیر سے انسانی حقوق کی خلاف ورزیوں پر عالمی توجہ نہیں ہٹا سکتا، اقوام متحدہ کے مبصر گروپ کو کام کرنے کی اجازت دی جائے۔
