لاہور: پی سی بی نے 2020 کے لیے کرکٹرز سمیت مختلف کیٹیگریز میں نمایاں کارکردگی دکھانے والوں کے لیے ایوارڈز کا اعلان کردیا۔
پاکستان کرکٹ بورڈ کی جانب سے قومی ٹیم کے کپتان بابر اعظم کو دو ایوارڈز دیے گئے، بابراعظم کو موسٹ ویلیو ایبل اور وائٹ بال کرکٹر آف دی ایئر کے ایوارڈز سے نوازا گیا۔
وکٹ کیپر بلے باز محمد رضوان کو ٹیسٹ کرکٹر آف دی ایئر قرار دیا گیا جب کہ فواد عالم کو بہترین انفرادی کارکردگی کا ایوارڈ مل گیا۔
فاسٹ بولر نسیم شاہ کو بیسٹ ایمرجنگ انٹرنیشنل کرکٹر کا ایوارڈ دیا گیا جب کہ بیسٹ ایمرجنگ ڈومیسٹک کرکٹر کا ایوارڈ پاکستان شاہینز کے وکٹ کیپر کپتان روحیل نذیر کے نام رہا۔ اسی طرح کامران غلام کو ڈومیسٹک کے بہترین کرکٹر کا ایوارڈ مل گیا۔
قومی ویمن کرکٹر عالیہ ریاض بیسٹ ویمن کرکٹر آف دی ایئر قرار پائیں جب کہ پی سی بی ایمرجنگ ویمن کرکٹر آف دی ایئر کا ایوارڈ فاطمہ ثنا نے اپنے نام کرلیا۔
آصف یعقوب پی سی بی امپائر آف دی ایئر قرار پائے جب کہ کارپوریٹ اچیومنٹ آف دی ایئر کا ایوارڈ پاکستان سوپر لیگ فائیو کو دیا گیا۔
