کراچی: ملک کی معروف اداکارہ نیلم منیر بھی کورونا وبا کی لپیٹ میں آگئیں۔
نیلم منیر نے کورونا وائرس میں مبتلا ہونے سے متعلق ’انسٹاگرام پوسٹ پر ایک تصویر شیئر کی۔
پوسٹ میں اداکارہ کا کہنا تھا کہ ’میں آپ سب کو کچھ ضروری باتیں بتانا چاہتی ہوں جن سے پچھلے چند روز سے میں گزر رہی تھی‘۔
اداکارہ کے مطابق ان کا کورونا وائرس کا ٹیسٹ مثبت آیا ہے تاہم ان کے تمام گھر والے وائرس سے محفوظ اور صحت مند ہیں۔
انہوں نے مزید لکھا کہ ‘یہ میرے اور میری فیملی کے لیے ایک بہت بڑا اور مشکل چیلنج ہے جس کا ہمیں سامنا کرنا پڑا، میں نے خود کو قرنطینہ کرلیا ہے اور الحمدللہ اب میں کافی بہتر محسوس کررہی ہوں‘۔
نیلم منیر نے لکھا کہ ‘میری اپنی تمام خیر خواہوں سے درخواست ہے کہ میری جلد صحت یابی کے لیے دعا کریں اور ایس او پیز پر لازمی عمل کریں‘۔
نیلم منیر نے عوام سے اپیل کی کہ ’اپنے پیاروں کی ماسک کے استعمال، بڑے اجتماعات سے گریز اور قوت مدافعت میں اضافہ کے ذریعے حفاظت کریں اور اللہ پر بھروسہ رکھیں‘۔
اداکارہ کی پوسٹ پر مداحوں نے ان کے لیے جلد صحت یابی کی دعا کی ہے۔