ٹھٹھہ: کینجھر جھیل میں کشتی کو ایک افسوس ناک واقعہ پیش آیا ہے، جس کے نتیجے میں ایک ہی خاندان کے 8 افراد جاں بحق ہوگئے، جاں بحق افراد میں 7 خواتین اور ایک بچہ شامل ہے۔ 3 کو بچالیا گیا، 2 افراد کی تلاش جاری ہے۔ حادثے کے شکار افراد کا تعلق محمود آباد سے بتایا جاتا ہے جو پکنک منانے کے لیے گئے تھے۔
تفصیلات کے مطابق کینجھر جھیل پر کشتی میں ملاح سمیت 13افراد سوار تھے، جھیل کی سیر کے دوران اچانک کشتی اُلٹ گئی، جس کے نتیجے میں ڈوبنے والوں میں سے 8 افراد جاں بحق ہوگئے جن کی لاشیں نکال لی گئی ہیں جب کہ 3 افراد کو بچالیا گیا، آخری اطلاعات آنے تک دو مسافر کی تلاش جاری تھی۔
دوسری طرف وزیراعلیٰ سندھ مُراد علی شاہ نے کشتی ڈوبنے کے واقعے کا نوٹس لے لیا ہے۔ ڈی سی ٹھٹھہ سے رپورٹ طلب کی گئی ہے۔
وزیراعلیٰ مُراد علی شاہ نے حکام سے واقعے کی رپورٹ طلب کرتے ہوئے پوچھا ہے کہ اس وقت ریسکیو ٹیم کہاں تھی؟ ان کا کہنا تھا کہ حادثے میں جانی نقصان ہوا جو بہت تکلیف کی بات ہے۔ متاثرہ خاندانوں سے ہر قسم کا تعاون کیا جائے۔