کراچی: معروف گلوکارہ آئمہ بیگ نے گلوکارہ سارہ رضا خان کی جانب سے کی گئی تنقید کا دلچسپ اور کرارا جواب دے ڈالا۔
سارہ رضا نے اپنے ایک تازہ انٹرویو میں آئمہ بیگ کے بارے میں کہا تھا کہ اگر آٹو ٹیون کا آپشن نکال دیا جائے تو پھر آئمہ بیگ گلوکارہ نہیں رہیں گی۔
سارہ رضا خان کی اس تنقید کے جواب میں آئمہ بیگ نے اپنی انسٹا اسٹوری پر مداحوں کی جانب سے سوشل میڈیا پر شیئر کیے گئے اپنے ویڈیو کلپس ری شیئر کرنا شروع کردیے۔
اُنہوں نے اپنی ایک انسٹا اسٹوری کے کیپشن میں لکھا کہ اللّٰہ نے جس کو جو ہنر دیا ہے ہمیں قبول ہے، ویسے کوئی بتائے یہ آنٹی کون ہیں؟ بلکہ رہنے دیں کوئی بات نہیں، مجھے ابھی اپنی چھٹیوں سے لطف اندوز ہونا چاہیے۔
آئمہ بیگ نے انسٹا اسٹوری پر گانا گاتے ہوئے اپنی ایک ویڈیو بھی شیئر کی، جس میں وہ بغیر کسی میوزک کے اپنا مشہور گانا بازی گاتے ہوئے نظر آرہی ہیں۔
اُنہوں نے اس ویڈیو کے کیپشن میں طنزیہ انداز میں لکھا کہ کیا کوئی مجھے یہاں آٹو ٹیون دے سکتا ہے؟
خیال رہے کہ آئمہ بیگ نے اپنے کیریئر کا آغاز 2016ء میں کیا تھا اور بہت مختصر عرصے میں ہی وہ ملک کے سب سے مشہور پلے بیک گلوکاروں میں اپنی جگہ بنانے میں کامیاب ہوگئی تھیں۔
آئمہ اپنی شاندار گلوکاری پر اب تک بہت سے ایوارڈز بھی اپنے نام کر چُکی ہیں جن میں تمغۂ امتیاز بھی شامل ہے۔
