ماہرہ خان کو پہلی بار میں نے ہی وی جے ہائر کیا تھا، وجاہت رؤف

کراچی: معروف ہدایت کار اور پروڈیوسر وجاہت رؤف نے انکشاف کیا ہے کہ سپراسٹار ماہرہ خان کو انہوں نے ہی پہلی مرتبہ بطور وی جے ہائر کیا تھا۔
معروف فلم ساز وجاہت رؤف نے اہلیہ و پروڈیوسر شازیہ وجاہت کے ساتھ ایک پوڈکاسٹ میں شرکت کی۔
پوڈ کاسٹ کے دوران وجاہت رؤف نے وضاحت دی کہ عام تاثر ہے کہ ہانیہ عامر کو میں نے شوبز میں انٹری دلوائی، لیکن درحقیقت ہانیہ گزشتہ 4 سے 5 سال سے کام کررہی تھی۔
وجاہت رؤف نے انکشاف کیا کہ سپراسٹار ماہرہ خان کو میں نے پہلی مرتبہ نجی ٹی وی پر بطور وی جے جاب دی تھی۔
ماہرہ کو ہائر کرنے سے متعلق وجاہت نے بتایا کہ کئی سال قبل میں ایک لانچنگ تقریب میں شریک تھا، اس دوران ماہرہ پر میری نظر پڑی، میں نے ماہرہ کو ڈانس کرتے دیکھا، اس پورے ایونٹ میں ماہرہ واضح انداز میں ایونٹ انجوائے کررہی تھیں۔
وجاہت رؤف کے مطابق اس کے بعد میں نے ماہرہ کو بطور وی جے اپنے چینل پر ہائر کرنے کی ٹھان لی، ہائرنگ کے بعد میری ماہرہ سے کمٹمنٹ ہوئی کہ وہ مجھے براہ راست ہی رپورٹ کریں گی، اس کے بعد ماہرہ نے اس چینل پر 3 سے 4 سال کام کیا، جب سے آج تک میرا ماہرہ سے بڑا قریبی تعلق ہے۔
ماہرہ خان کے ساتھ کام کرنے کے سوال پر وجاہت رؤف اور ان کی اہلیہ شازیہ وجاہت نے بتایا کہ ماضی میں ہم کئی مرتبہ ماہرہ کے ساتھ کام کرنے کا ارادہ کرچکے ہیں، لیکن کبھی معاوضے اور کبھی مصروفیات کی وجہ سے یہ سلسلہ آگے نہیں بڑھ سکا مگر مستقبل میں ہم ماہرہ اور فواد دونوں کے ساتھ کام کا ارادہ رکھتے ہیں۔
خیال رہے کہ ماہرہ خان نے اپنے شوبز کیرئیر کا آغاز 2006 میں بطور وی جے کیا تھا مگر ان کے حصے میں بڑی کامیابی ڈرامہ سیریل ہم سفر کی صورت آئی۔
بعد ازاں ماہرہ نے اپنی فلمی کیریئر کا آغاز شعیب منصور کی فلم بول سے کیا جس نے ماہرہ کے فلمی کیریئر کو شہرت کی بلندیوں پر پہنچادیا، اس کے بعد ماہرہ مختلف فلموں میں نظر آئیں، یہی نہیں ماہرہ خان کو بولی وڈ فلم رئیس میں شاہ رخ خان کے ساتھ بھی کام کا اعزاز حاصل ہے۔