کراچی: ایم کیو ایم پاکستان کے سینئر رہنما فاروق ستار کا کہنا ہے کہ دو شادیاں کرنا بہت جرأت کی بات ہے اور جن کا اپنی پہلی بیوی کے ساتھ اچھا گزر بسر ہورہا ہے میں انہیں کبھی دو شادیوں کا مشورہ نہیں دوں گا۔
حال ہی میں ڈاکٹر فاروق ستار نے نجی ٹی وی کی رمضان ٹرانسمیشن میں شرکت کی جہاں انہوں نے مختلف موضوعات پر گفتگو کی۔
میزبان کی جانب سے سیاسی رہنما سے 2 شادیوں سے متعلق پوچھا گیا، جس پر انہوں نے کہا کہ ان کی ایک اہلیہ کراچی اور دوسری اہلیہ شاہدہ اسلام آباد میں رہتی ہیں، جو ایک ماہر ماحولیات ہے۔
فاروق ستار نے مزاحیہ انداز میں کہا کہ جب دونوں مجھے بہت تنگ کرتی ہیں تو میں انہیں مذاق میں کہتا ہوں کہ لاہور کا بھی خیال رکھنا، یہ صرف ہنسی مذاق کی حد تک تھا، اللہ کرے جب میں گھر جاؤں تو گھر کا ماحول ٹھیک ہو۔
سوال پوچھا گیا کہ کیا آپ دوسروں کو 2 شادیوں کا مشورہ دیں گے؟ اس کے جواب میں فاروق ستار نے کہا کہ دو شادیاں کرنا بہت جرأت کی بات ہے، جن کا اپنی پہلی بیوی کے ساتھ اچھا گزر بسر ہورہا ہے میں انہیں کبھی دو شادیوں کا مشورہ نہیں دوں گا۔
انہوں نے مزید کہا کہ لوگ اپنے حالات دیکھ کر شادی کریں، میں کسی کو بھی 2 شادیوں پر اپنی رائے نہیں دوں گا۔
