کراچی: سیکیورٹی حکام نے آج کراچی میں میڈیا کے نمائندوں کو بریفنگ دی اور مختلف سوالات کے تفصیلی جوابات دیے۔ بریفنگ کے دوران حکام نے وضاحت کی کہ تیراہ میں کوئی بڑا فوجی آپریشن نہیں ہورہا، بلکہ صرف انٹیلی جنس بیسڈ آپریشنز(IBOs) جاری ہیں۔ یہ کارروائیاں پچھلے تین سال سے فتنہ الخوارج اور فتنہ الہندوستان کے خلاف کی جارہی ہیں۔ سیکیورٹی ذرائع کے مطابق دہشت گردی کے خلاف سب سے موثر طریقہ یہی ہے۔
سیکیورٹی ذرائع نے کہا کہ دہشت گردوں کے خلاف یہ کارروائیاں مکمل انٹیلی جنس معلومات کی بنیاد پر کی جارہی ہیں اور آخر تک جاری رہیں گی جب تک کہ تمام دہشت گرد ختم نہ ہوجائیں۔ ذرائع نے واضح کیا کہ وادی تیراہ میں کسی بڑے فوجی آپریشن کا پروپیگنڈا غلط اور بے بنیاد ہے۔ فوج کی تعداد میں اضافہ نہیں کیا گیا اور نہ ہی کسی راستے پر نئی چیک پوسٹ قائم کی گئی ہے۔ موجودہ موسم بھی بڑے پیمانے کے آپریشن کے لیے غیر مناسب ہے۔
حکام نے مزید بتایا کہ دہشت گردوں اور جرائم پیشہ افراد کا گٹھ جوڑ بے نقاب ہوچکا ہے اور سیکیورٹی ادارے عوام کے ساتھ مکمل تعاون میں ہیں۔ قبائلی عوام اور معززین کی مشاورت سے تمام فیصلے کیے جاتے ہیں تاکہ مقامی روایات اور حالات کا پورا خیال رکھا جاسکے۔
سیکیورٹی ذرائع نے یہ بھی کہا کہ بلوچستان میں فتنہ الہندوستان اصل میں عوام کی سہولتوں اور ترقی کے دشمن ہیں اور دہشت گرد عوام کو احساس محرومی میں مبتلا کرنے کی کوشش کرتے ہیں مگر بلوچستان کے عوام اب ان کی نیت پہچان چکے ہیں۔ ذرائع کے مطابق، عوام اور فوج کے درمیان اعتماد کا کوئی بیانیہ دراڑ نہیں ڈال سکتا اور مقامی مشاورت ہر فیصلے میں بنیادی حیثیت رکھتی ہے۔
علاوہ ازیں، حکام نے یہ بتایا کہ مستقبل میں بھی IBOs کے ذریعے چھوٹی لیکن مؤثر کارروائیاں جاری رہیں گی، تاکہ دہشت گردوں کے نیٹ ورک کو کمزور کیا جاسکے اور عوام کی حفاظت یقینی بنائی جاسکے۔
