اسلام آباد: وزیر اعظم عمران خان نے سابق افغان صدر حامد کرزئی سے ٹیلیفونک رابطہ کرتے ہوئے انہیں اپنے دیگر رہنماؤں کے ہمراہ پاکستان کے زیر اہتمام ہونے والے ایک بین الاقوامی کانفرنس میں شرکت کی دعوت دے دی۔
ایک ٹوئٹ میں وزیر اطلاعات فواد چوہدری نے کہا کہ وزیر اعظم نے حامد کرزئی کو یقین دلایا کہ پاکستان ہمسایہ ملک میں امن کی بحالی کے لیے تمام تر کوششیں کرے گا۔
افغانستان کے استحکام اور سلامتی کیلئے پاکستان کی کوششیں جاری ہیں
وزیراعظم عمران خان نے اب سے کچھ دیر پہلے افغانستان کے سابق صدر حامد کرزئ سے فون پر گفتگو کی، پاکستان افغانستان کے مسئلے پر ایک خصوصی کانفرنس کی میزبانی کر رہا ہے اس کانفرنس کی تفصیلات جلد سامنے لائ جائینگی— Ch Fawad Hussain (@fawadchaudhry) July 14, 2021
ذرائع نے بتایا کہ پاکستانی حکام نے سرحد پر اپنی فورسز کو الرٹ کردیا ہے اور کسی بھی ناخوشگوار واقعے سے بچنے کے لیے سرحدی علاقے میں اضافی دستے تعینات کردیے ہیں۔
دونوں اطراف سے پاک افغان سرحد کی بندش کی وجہ سے خواتین اور بچوں سمیت بڑی تعداد میں افغان شہری چمن میں پھنسے ہوئے ہیں۔
سرکاری ذرائع نے بتایا کہ ’چمن میں علاج کے لیے آنے والے مریضوں سمیت تقریباً 500 افغان اب اپنے آبائی علاقوں میں واپس جانے کے منتظر ہیں‘۔
ان کا کہنا تھا کہ سرحد بند ہونے کی وجہ سے افغانستان جانے والی سینکڑوں ٹرک اور گاڑیاں چمن میں پھنس گئی ہیں۔