کراچی: وائس آف سندھ کے پروجیکٹ ڈائریکٹر اور سماجی و فکری حلقوں میں اپنی سنجیدہ اور مدلل آواز کے باعث پہچانے جانے والے ڈاکٹر عمیر ہارون نے سابق گورنر اسٹیٹ بینک آف پاکستان محترمہ شمشاد اختر کے انتقال پر گہرے رنج و غم کا اظہار کرتے ہوئے اسے نہ صرف اہلِ خانہ بلکہ پوری قوم کے لیے ایک ناقابلِ تلافی نقصان قرار دیا ہے۔
اپنے تعزیتی بیان میں ڈاکٹر عمیر ہارون نے کہا کہ محترمہ شمشاد اختر اُن باوقار، باصلاحیت اور دیانت دار شخصیات میں شامل تھیں جنہوں نے علم اور پیشہ ورانہ بصیرت کو عملی طور پر قومی خدمت میں ڈھالا۔ نہایت مشکل معاشی حالات میں انہوں نے ملکی مالیاتی نظام کے استحکام، نظم و ضبط اور معاشی پالیسیوں کی تشکیل میں کلیدی کردار ادا کیا، جو ہمیشہ قدر کی نگاہ سے دیکھا جائے گا۔
انہوں نے کہا کہ مرحومہ کی شخصیت صرف ایک ماہرِ معیشت تک محدود نہیں تھی بلکہ وہ اصول پسندی، خودداری اور ادارہ جاتی مضبوطی کی علامت تھیں۔ ان کی قیادت میں کیے گئے فیصلے ذاتی مفادات سے بالاتر ہوکر قومی ضرورتوں کو مدنظر رکھتے ہوئے کیے گئے، جو آج کے دور میں ایک روشن مثال ہیں اور نئی نسل کے لیے مشعلِ راہ ثابت ہوں گے۔
ڈاکٹر عمیر ہارون نے مزید کہا کہ محترمہ شمشاد اختر کی وفات سے پیدا ہونے والا خلا آسانی سے پُر نہیں ہوسکے گا، تاہم ان کی خدمات، فکر اور طرزِ عمل آنے والے وقتوں میں رہنمائی فراہم کرتے رہیں گے۔
انہوں نے مرحومہ کے لواحقین سے دلی تعزیت اور ہمدردی کا اظہار کرتے ہوئے کہا کہ پوری قوم اس دکھ کی گھڑی میں سوگوار خاندان کے ساتھ ہے اور دعا ہے کہ اللہ تعالیٰ محترمہ شمشاد اختر کو جنت الفردوس میں اعلیٰ مقام عطا فرمائے اور لواحقین کو یہ صدمہ صبر و حوصلے کے ساتھ برداشت کرنے کی توفیق دے۔ (آمین)۔
