سوشل میڈیا سے کچھ دن کا وقفہ ذہنی صحت کیلئے فائدہ مند

کراچی: نئی تحقیق میں بتایا گیا ہے کہ سوشل میڈیا سے کچھ روز کا وقفہ بھی ذہنی صحت میں مناسب بہتری لاسکتا ہے۔
جرنل جاما نیٹ ورک میں شائع ہونے والی تحقیق میں معلوم ہوا کہ سوشل میڈیا کو صرف ایک ہفتے کے لیے ترک کرنے سے ہی اینزائٹی، ڈپریشن اور نیند کے مسائل میں واضح کمی واقع ہوسکتی ہے۔
ہارورڈ یونیورسٹی کے محققین نے 18 سے 24 برس کے 295 نوجوانوں کی ذہنی صحت کا تین ہفتوں تک مطالعہ کیا۔
ابتدائی دو ہفتوں میں شرکاء نے سوشل میڈیا استعمال کیا، لیکن تیسرے ہفتے میں تمام نے سات دن کا وقفہ لیا۔
تحقیق کے نتائج میں یہ بات سامنے آئی کہ سوشل میڈیا سے وقفے کے سبب اینزائٹی میں 16 فیصد، ڈپریشن میں تقریباً 25 فیصد اور بے خوابی میں 14 فیصد کمی واقع ہوئی۔
ان افراد میں زیادہ واضح تبدیلیاں دیکھی گئیں، جن میں تحقیق کی ابتدا میں ڈپریشن کی شدید علامات موجود تھیں۔