کراچی: پاکستان سے تعلق رکھنے والی اداکارہ حرا سومرو کو رنویر سنگھ کے ساتھ اے آئی تصاویر شیئر کرنا مہنگا پڑگیا۔
حرا اکثر اپنے خیالات سوشل میڈیا پر کھل کر بیان کرتی ہیں، چاہے اس پر تنقید ہی کیوں نہ ہو۔ تاہم اس بار ان کے تازہ اقدام نے انہیں سوشل میڈیا پر شدید ردِعمل کا سامنا کروا دیا ہے۔
تیرے بن اور دو کنارے جیسے مقبول ڈراموں میں اداکاری کے جوہر دکھانے والی حرا سومرو نے بولی وُڈ ایکٹر رنویر سنگھ کے ساتھ ایک رومانوی اے آئی فوٹو شوٹ تخلیق کیا۔
یہ سب ایسے وقت میں سامنے آیا ہے جب رنویر سنگھ کی پاکستان مخالف فلم دھرندر ریلیز ہوچکی اور اس پر پاکستان میں خوب تنقید کی جارہی ہے، اس فلم میں پاکستان کو منفی اور غیر حقیقی انداز میں دکھایا گیا ہے۔
فلم کے اس تاثر کے باوجود حرا نے اپنے پسندیدہ اداکار کی حمایت جاری رکھی اور تصاویر کو مزاحیہ اور چلبلے کیپشنز کے ساتھ شیئر کیا۔
ایک تبصرے میں انہوں نے یہ بھی کہا کہ رنویر سنگھ مسلمانوں سے نفرت نہیں کرتے، بس انہیں پیسہ بہت پسند ہے۔
سوشل میڈیا صارفین ان تصاویر پر سخت برہم ہیں اور حرا کو شدید تنقید کا نشانہ بنا رہے ہیں۔
ایک صارف نے لکھا کہ پاکستانی اداکاروں میں واقعی کوئی خودداری نہیں بچی۔
کسی نے کہا کہ اینٹی پاکستان فلم کے بعد بھی ایسی تصویریں؟ حیرت ہے جب کہ ایک صارف نے سوال اٹھایا کیا ہم اتنے کم ظرف ہوگئے ہیں؟۔
