گلوکار بلال مقصود نے یونیسـیف کے تعاون سے پکے دوست سیزن بچپن بے مثال کا اجرا کردیا

کراچی: بچوں کے عالمی دن پر نامور گلوکار بلال مقصود نے یونیسیـف کے تعاون سے آغا خان یونیورسٹی کے آڈیٹوریم میں شاندار تقریب کا انعقاد کیا، ٹیلی ویژن اور فلموں کی معروف اداکارہ صنم سعید نے کمپیئرنگ کے فرائض سرانجام دیے۔ بلال مقصود، فلم ڈائریکٹر بینش اور عمر عادل نے تمام کو ویلکم کیا۔ بلال مقصود نے کہا کہ وہ نئی نسل کے لیے اردو زبان کو کول بنانا چاہتے ہیں۔ اسکول میں سب سے بورنگ کلاس اردو کی ہوتی ہے۔ پکے دوست کے سیزن بچپن بے مثال کافی اسکولوں میں بچوں کو دکھائے جارہے ہیں اور امید ہے کہ یونیسیف کے ساتھ کیا گیا یہ پروجیکٹ بچپن بے مثال بچوں میں تفریح کے ساتھ تعلیم اور آگاہی کا کام بھی کرے گا۔
اس موقع پر اداکارہ صنم سعید کا کہنا تھا کہ بچوں کو اسکول میں داخل کروانے سے پہلے گھر میں تربیت کریں۔ پہلے پانچ برس بہت اہم ہوتے ہیں۔ پکے دوست کا سیزن بچپن بے مثال، اس سلسلے میں اہم رہنمائی کرتا دکھائی دیتا ہے۔
پکے دوست کے پروڈیوسر اور ڈائریکٹر بینش اور عمر عادل نے بتایا کہ ہمیں دنیا بھر سے پکے دوست کا شاندار رسپانس مل رہا ہے۔ موجودہ دور میں بچوں کے پروگرام کی اشد ضرورت ہے۔ ہم نے اس پروجیکٹ میں بچوں کی نفسیات کو سامنے رکھا، اسی وجہ سے بچے اس میں بھرپور دلچسپی لے رہے ہیں۔
سینئر اداکار ایاز خان کا کہنا تھا کہ انور مقصود کی طرح ان کا بیٹا بھی لاجواب کام کررہا ہے۔ تقریب میں یونیسـیف کی ڈاکٹر صبا شجاع اور پولیو ٹیم کے melissa corkum نے پروگرام کے اغراض و مقاصد پیش کیے۔ اس موقع پر پکے دوست سیزن 4 کی شو ریل بھی دکھائی گئی۔ مہمانوں کو گلدستے پیش کیے گئے۔ آخر میں تمام حاضرین کی پُرتکلف تواضع کی گئی۔