لاہور: بین الاقوامی شہرت یافتہ پاکستانی گلوکار اور اداکار علی ظفر نے زندگی کی 44 بہاریں دیکھ لیں، علی ظفر کو فنی خدمات پر ملکی اور غیر ملکی متعدد ایوارڈ سے بھی نوازا جا چکا ہے۔
ممتاز گلوکار، موسیقار، اداکار اور ماڈل علی ظفر 18 مئی 1980 کو لاہور میں پیدا ہوئے اور فنی کیریئر کا آغاز اداکارہ و ہدایتکارہ ثمینہ پیرزادہ کی فلم شرارت میں گانا گا کر کیا۔
علی ظفر کو اپنے گانوں کی البم حقہ پانی کے گانے چھنو کی آنکھ میں اک نشہ ہے سے بے پناہ شہرت حاصل ہوئی جب کہ ان کے حمدیہ اور نعتیہ کلام کو بھی بہت زیادہ پسند کیا گیا۔
انہوں نے فن اداکاری کا آغاز پاکستانی ڈراموں سے کیا، بولی وُڈ میں کامیڈی فلم تیرے بن لادن کے ذریعے انٹری دی، جس کے بعد علی ظفر پاک بھارت کے ابھرتے ہوئے اسٹار بن گئے۔
پاکستان اور بھارت میں موسیقی کے میدان میں کامیابی کے جھنڈے گاڑنے والے علی ظفر کو بے شمار ایوارڈز سے بھی نوازا جا چکا ہے۔