کراچی: ٹی وی کے مقبول اداکار سمیع خان نے اداکارہ علیزے شاہ اور منسا ملک کے درمیان ہونے والی لڑائی کا آنکھوں دیکھا حال بیان کرڈالا۔
ان دنوں اداکارہ علیزے شاہ اور منسا ملک کے درمیان ہونے والی لڑائی خبروں کی زینت بنی ہوئی ہے۔
علیزے شاہ اور منسا ملک نے 2023 میں ایک نجی ٹی وی چینل کے ڈرامے میں ایک ساتھ کام کیا تھا، جہاں دونوں کے درمیان جھگڑا ہوا جو اس قدر بڑھ گیا کہ نوبت ہاتھا پائی تک آگئی۔
علیزے شاہ نے اپنے ساتھ پیش آئے واقعے کو سوشل میڈیا پر کھل کر بیان کیا اور پورا قصہ بتایا کہ ڈرامے کے سیٹ پر منسا ملک نے پہلے انہیں تھپڑ مارا جس کے جواب میں انہوں نے بھی چپل دے ماری، لیکن منسا ملک نے سوشل میڈیا پر مجھے ہی تنقید کا نشانہ بنایا، جس سے نہ صرف میرا کام بلکہ زندگی بھی متاثر ہوئی۔
تاہم اس تنازع میں اب اداکار سمیع خان بھی سامنے آئے ہیں، جو ڈرامے کی کاسٹ کا حصے ہونے کے ساتھ واقعے کے عینی شاہد بھی ہیں۔
سمیع خان نے ایک پروگرام میں اداکاراؤں کے نام لیے بغیر ان کے درمیان لڑائی کی حقیقت بتاتے ہوئے کہا کہ وہ میک اپ روم میں بیٹھے فون کال پر اپنا ضروری کام کررہے تھے کہ ایک اداکارہ آئی اور مجھے کہنے لگی کہ میں نے کردیا، جو مجھے سمجھ نہیں آیا لیکن اتنی ہی دیر میں دوسری اداکارہ اندر داخل ہوئی، دونوں کے درمیان لفظی تکرار ہوئی اورپھر چپل اٹھا کر پھینکی گئی جو دیوار پر جا لگی۔
انہوں نے کہا کہ میں ضروری کال پر تھا تو اٹھ کر باہر چلا گیا اور پھر فری ہونے کے بعد پورا ماجرا پوچھا۔
سمیع خان نے مزید کہا کہ سیٹ پر کسی کو بھی ہاتھ اٹھانے کی اجازت نہیں، اگر کوئی مسئلہ تھا تو ڈائریکٹر سے بات کرنی چاہیے تھی لیکن اچھی بات یہ ہے کہ جس اداکار کے ساتھ زیادتی ہوئی تھی، اس نے اپنے ڈرامے کی شوٹنگ کا کام مکمل کرایا۔