اسلام آباد: ریسکیو 1122 سروس وفاقی دارالحکومت میں بھی شروع کرنے کا فیصلہ کرلیا گیا، اسی ماہ سروس کا آغاز کیا جائے گا۔
وزارت داخلہ کے مطابق پنجاب کی طرز پر اسلام آباد میں ریسکیو 1122 کا آغاز کیا جارہا ہے، وزیر داخلہ شیخ رشید کا کہنا تھا کہ ریسکیو 1122 میں فائر سروس، ایمبولینس اور دیگر ایمرجنسی سروسز شامل ہوں گی. ریسکیو 1122 سروس کا آغاز اِسی ماہ کیا جائے گا۔
شیخ رشید کا کہنا تھا کہ ریسکیو 1122 سروس میں ابتدائی طور پر 20 گاڑیاں شامل ہوں گی. دوسرے مرحلے میں گاڑیوں کی تعداد کو بڑھاکر 40 کیا جائے گا۔ دارالحکومت اسلام آباد کو محفوظ ترین شہر بنایا جارہا ہے۔
انہوں نے کہا کہ اسلام آباد میں ہائی رائز عمارتیں بننے سے ایمرجنسی سروسز پر مزید بوجھ آئے گا۔ فائر سروس اور دیگر ایمرجنسی سروسز کو اپ گریڈ کرنے کی فوری ضرورت ہے۔
وزیر داخلہ نے دورے کے دوران آگ بجھانے اور ایمرجنسی ہینڈلنگ اور مشقوں کا معائنہ بھی کیا۔
