کراچی: رمضان المبارک کا چاند دیکھنے کے لیے مرکزی رویت ہلال کمیٹی کا اجلاس پشاور میں شروع ہوگیا۔
مرکزی رویت ہلال کمیٹی کا اجلاس اوقاف ہال میں جاری ہے، جس کی سربراہی چیئرمین کمیٹی مولانا عبدالخیبر آزاد کررہے ہیں۔
محکمۂ موسمیات کے مطابق ملک میں رمضان المبارک کا چاند نظر آنے کا امکان نہیں۔
محکمہ موسمیات کا کہنا ہے کہ آج صبح 5 بج کر 44 منٹ پر چاند کی پیدائش ہوئی ہے اور چاند نظر آنے کے لیے اس کی عمر 16 سے 18 گھنٹے ہونی چاہیے۔
محکمہ موسمیات کے مطابق کراچی میں بادل موجود ہیں، بلوچستان اور پنجاب میں مطلع صاف ہے۔
دوسری جانب سپارکو کا کہنا ہے کہ چاند صبح 5:44 بجے پیدا ہوا ہے، غروب افتاب کے وقت عمر 12 گھنٹے ہوگی، چاند کی کم بلندی اور فاصلے کی وجہ سے آج نظر آنا مشکل ہے۔
ترجمان کا کہنا ہے کہ چاند اور سورج کا زاویائی فاصلہ 7 ڈگری ہے، چاند انسانی آنکھ سے نظر نہیں آئے گا، پاکستان میں رمضان المبارک 2 مارچ 2025 سے شروع ہونے کا امکان ہے۔
ترجمان سپارکو کا کہنا تھا کہ سعودی عرب میں 28 فروری کو چاند نظر آسکتا ہے۔
ترجمان نے بتایا کہ شوال کا چاند 30 مارچ کو متوقع ہے، عیدالفطر 31 مارچ کو ہوسکتی ہے جب کہ رمضان کے چاند کی رویت کا حتمی فیصلہ رویت ہلال کمیٹی کے پاس ہے۔
