قندھار: پچھلے ہفتے کی طرح اس بار بھی افغانستان کی ایک مسجد میں نماز جمعہ کے دوران دھماکے کا واقعہ پیش آیا ہے، جس میں کئی ہلاکتوں کے اندیشے ظاہر کیے جارہے ہیں۔
تفصیلات کے مطابق افغانستان کے جنوبی شہر قندھار کی مسجد میں نماز جمعہ کے دوران دھماکا، کئی ہلاکتوں کا خدشہ ظاہر کیا جارہا ہے۔
افغان وزارت داخلہ کے ترجمان قاری سعید خوستی نے کہا کہ حکام دھماکے کی تفصیلات اکٹھا کررہے ہیں۔
مقامی صوبائی کونسل کے ایک سابق رکن نعمت اللہ وفا نے بتایا کہ مسجد میں ہونے والے دھماکے میں بھاری جانی نقصان ہوا تاہم فوری طور پر کوئی تفصیلات نہیں ہیں تاہم مقامی ذرائع کا بتانا ہے کہ دھماکے میں16افراد ہلاک اور 40 زخمی ہوئے۔
خیال رہے گزشتہ جمعے کو بھی شمالی شہر قندوز میں ایک مسجد میں بم دھماکے میں متعدد افراد ہلاک ہوئے۔ داعش نے قندوز کی مسجد میں ہونے والے دھماکے کی ذمے داری قبول کی تھی۔
