سیئول: جنوبی کوریا سے تعلق رکھنے والے معروف پاپ سنگر، اداکار اور یوٹیوبر داؤد کم نے مسجد بنانے کا اعلان کردیا۔
عالمی شہرت یافتہ سنگر اور یوٹیوبر داؤد کم نے سوشل میڈیا پر جنوبی کوریا کے شہر ان شن میں مسجد بنانے کا اعلان کیا۔
داؤد کم نے اپنے سوشل میڈیا اکائونٹ پر مسجد کی تعمیر کے لیے خریدی گئی زمین اور اس کے معاہدے کی تصاویر شیئر کرتے ہوئے لکھا کہ آخرکار آپ کی مدد سے مسجد کی تعمیر کا معاہدہ کرلیا۔ اس زمین پر اب جلد ایک مسجد بن جائے گی، مجھے یقین نہیں آرہا۔ اس سلسلے میں بہت سی مشکلات کا سامنا کرنا پڑا، لیکن مجھے یقین تھا کہ میں یہ کام کرلوں گا۔
انہوں نے مزید کہا کہ مسجد کے ساتھ کورین شہریوں کو دین کی دعوت دینے کے لیے اسلامک پوڈ کاسٹ اسٹوڈیو بھی بنایا جائے گا۔ جنوبی کوریا کی ہر گلی میں اذان کی خوبصورت آواز گونجنے تک میں جدوجہد کرتا رہوں گا۔
سنگر، یوٹیوبر اور اداکار داؤد کم نے جو جے کم کے نام سے مشہور ہیں، 2019 میں اسلام قبول کیا تھا اور متعدد بار اپنی سوشل میڈیا پوسٹس میں مکہ مکرمہ اور مدینہ منورہ میں حاضری کی خواہش کا اظہار کیا تھا۔ داؤد کم نے 2022 میں رمضان المبارک کے دوران عمرے کی سعادت حاصل کی تھی۔