نئی دہلی: بھارت میں انڈیگو ایئر کی انتظامی غفلت کے باعث پائلٹس کے اوقات کار کا تاحال تعین نہ ہوسکا، جس کے باعث آج بھی انڈیا میں سیکڑوں پروازیں منسوخ ہوگئیں۔
بھارتی میڈیا کے مطابق انڈیگو کے فلائٹ آپریشنز کی مشکلات کم ہونے کا نام نہیں لے رہیں اور بحران کے پانچویں روز بھی ملک بھر کی سیکڑوں مقامی پروازیں پائلٹس کی قلت کے باعث منسوخ کردی گئیں۔
میڈیا رپورٹس کے مطابق بھارتی ایئرلائن 400 طیاروں کے ساتھ روزانہ کی بنیاد پر 2300 پروازیں آپریٹ کرتی ہے۔
بھارتی میڈیا رپورٹس کے مطابق انڈیگو میں پائلٹس کا بحران انتظامیہ کی جانب سے کسی قسم کی پلاننگ نہ ہونے کے باعث ہوا اور حکام کی جانب سے معاملے کو دیکھا جارہا ہے۔
میڈیا رپورٹس کے مطابق نئی دہلی، ممبئی، پونے، بنگلورو، چنئی، حیدرآباد اور گجرات کے ایئرپورٹس سے 400 سے زائد پروازیں منسوخ ہوچکی ہیں، جس کے باعث ہزاروں مسافروں کو شدید پریشانی کا سامنا کرنا پڑرہا ہے۔
غیر ملکی خبر رساں ایجنسی کے مطابق فضائی سفر کو مزید محفوظ بنانے کے لیے بھارتی حکام نے پائلٹس کے اوقات کار پر نئی پابندیاں عائد کی ہیں۔
انڈیگو ایئرلائن نے اعتراف کیا کہ وہ یکم نومبر کی ڈیڈلائن سے پہلے ان قواعد کے نفاذ کی مناسب تیاری نہیں کرسکی، یوں دسمبر کے مصروف ٹریول سیزن کے آغاز سے قبل رواں ہفتے بڑے پیمانے پر پروازوں کی منسوخی ہوئی، جس سے ہزاروں مسافر ایئرپورٹس پر پھنس کر رہ گئے۔
