کراچی: پاکستان کے فیشن آئیکون حسن شہریار یاسین عرف ایچ ایس وائی اب فیشن کی دنیا سے ایک قدم آگے بڑھ کر ہالی وُڈ کی دنیا میں قدم رکھ رہے ہیں۔
ایچ ایس وائی نے نہ صرف ڈزنی پلس کی نئی ریلیز ہونے والی ہالی وُڈ سیریز ’ڈیلی بوائز‘ کی پروڈکشن کے لیے ملبوسات ڈیزائن کیے ہیں بلکہ ہالی وُڈ میں اپنا آن اسکرین ڈیبیو بھی کررہے ہیں۔
یاد رہے کہ معروف ڈیزائنر حسن شہریار یاسین ایسا کام کرنے والے واحد پاکستانی ڈیزائنر ہیں، جن کے ملبوسات ہالی وُڈ کی سیریز کا حصہ ہوں گی بلکہ وہ خود بھی اسی سیریز میں اداکاری کے جوہر دکھائیں گے۔
احمد ابراہیم اور جینی کونر (گرلز) کی ہدایت کاری میں بننے والی ڈیلی بوائز کا پریمیئر 6 مارچ کو Hulu اور Disney+ پر ہوا جس میں مزاحیہ اور سنسنی خیز داستان پیش کی گئی ہے جو ایک پاکستانی نژاد امریکی خاندان کے گرد گھومتی ہے۔
ایچ ایس وائی نے اس سیریز کی آٹھویں اور نویں قسط میں مرکزی کرداروں کے ملبوسات ڈیزائن کیے ہیں اور انہیں قسطوں میں وہ آن اسکرین جلوہ گر ہوں گے۔
