نیپئر: 3 میچز پر مشتمل ون ڈے سیریز کے پہلے میچ میں نیوزی لینڈ نے پاکستان کو 73 رنز سے شکست دے دی۔
نیوزی لینڈ اور پاکستان کے درمیان ون ڈے سیریز کا پہلا میچ نیپیئر میں کھیلا گیا جہاں پاکستان کرکٹ ٹیم کے کپتان محمد رضوان نے ٹاس جیت کر نیوزی لینڈ کو بیٹنگ کی دعوت دی۔
میزبان نیوزی لینڈ نے مقررہ 50 اوورز میں 9 وکٹوں کے نقصان پر 344 رنز بنائے، کیویز کی اننگز میں مارک چپمین نے 132 کی شاندار اننگز کھیلی اور نمایاں رہے۔
نیوزی لینڈ کے 345 رنز کے ہدف کے تعاقب میں پاکستان کی جانب سے اننگز کا آغاز عبداللہ شفیق اور عثمان خان نے کیا، تاہم اوپننگ پارٹنر شپ ٹیم کے لیے زیادہ رنز بنانے میں ناکام رہی۔
اوپنر عثمان خان 39 اور عبداللہ شفیق 36 رنز پر کیویز بولرز کا شکار ہوگئے، جس کے بعد پاکستان کی تیسری وکٹ کپتان محمد رضوان کی صورت 30 رنز پر گرگئی۔
3 وکٹیں گرنے کے بعد قومی ٹیم کے بیٹسمین بابراعظم نے ذمے دارانہ بیٹنگ کی تاہم بابر 83 گیندوں پر 78 بناکر آؤٹ ہوگئے۔
بابراعظم کے بعد قومی ٹیم کی ساری وکٹیں ایک کے بعد ایک کرتے گرتی چلی گئیں، طیب طاہر ایک، عرفان خان صفر، نسیم شاہ صفر، حارث رؤف ایک، عاکف جاوید ایک اور محمد علی صفر پر آؤٹ ہوئے اور یوں پاکستان کی پوری ٹیم 44 ویں اوور میں 271 رنز بناکر آؤٹ ہوگئی۔ سلمان علی آغا نے 58 رنز کی عمدہ باری کھیلی۔
پاکستان کی جانب سے عرفان خان نے 3 وکٹیں حاصل کیں جب کہ حارث رؤف اور عاکف جاوید نے 2، 2، نسیم شاہ اور محمد علی نے ایک ایک کھلاڑی کو آؤٹ کیا۔
واضح رہے کہ پہلے ون میں پاکستان کی جانب سے عاکف جاوید، محمد علی اور عثمان خان نے ڈیبیو کیا تھا۔
قبل ازیں نیوزی لینڈ نے پاکستان کو 5 میچز کی ٹی ٹوئنٹی سیریز میں1-4 سے شکست دی تھی۔
