کٹھمنڈو: نیپال سے تعلق رکھنے والے کرکٹر سندیپ لامیچانے کو لڑکی سے زیادتی کے جرم میں 8 سال قید کی سزا سنادی گئی۔
میڈیا رپورٹس کے مطابق گزشتہ ماہ سندیپ لامیچانے پر لڑکی سے زیادتی کا جرم ثابت ہوا تھا، عدالت نے کہا تھا کہ زیادتی کے وقت لڑکی نابالغ نہیں تھی اور سزا آئندہ ماہ سنائی جائے گی۔
تاہم اب 10 جنوری کو کٹھمنڈو کی عدالت نے سندیپ لامیچانے کو 8 سال قید کی سزا سنائی اور اس کے ساتھ نیپالی کرکٹر پر قریباً 1500 ڈالر کا جرمانہ بھی عائد کیا۔
رپورٹ کے مطابق لامیچانے کے وکیل کا کہنا ہے کہ ہم عدالت کے اس فیصلے کے خلاف اعلیٰ عدالت میں اپیل دائر کریں گے۔
واضح رہے ستمبر 2022میں مبینہ طور پر 17 سالہ لڑکی نے سندیپ کے خلاف شکایت درج کروائی تھی، جس میں الزام لگایا گیا تھا کہ کرکٹر نے کھٹمنڈو کے ایک ہوٹل کے کمرے میں اس کے ساتھ زیادتی کی۔
خیال رہے کہ سندیپ پی ایس ایل میں لاہور قلندرز کی نمائندگی بھی کرچکے ہیں۔
