مودی کا پاکستانی فضائی حدود کا استعمال، خیرسگالی پیغام بھی نہیں دیا

لاہور/ نئی دہلی: بھارتی وزیراعظم نریندر مودی نے ایک بار پھر سفارتی آداب کو کسی خاطر میں نہ لاتے ہوئے پاکستانی فضائی حدود استعمال کی، مگر کوئی خیر سگالی کا پیغام نہیں دیا۔
ایوی ایشن ذرائع کے مطابق بھارتی وزیراعظم نریندر مودی نے فرانس جاتے ہوئے پاکستان کی فضائی حدود استعمال کی۔ بھارتی وزیراعظم کے جہاز نے دہلی سے پیرس جاتے ہوئے فضائی حدود کا استعمال کیا۔ انٹرنیشنل ایوی ایشن قوانین کے تحت کوئی بھی ملک فضائی حدود استعمال کرسکتا ہے۔ اس سفر میں بھارتی وزیراعظم نریندر مودی کا جہاز لاہور کی فضائی حدود سے بھی گزرا۔
ذرائع نے بتایا کہ نریندر مودی نے اپنے 3 روزہ دورۂ فرانس کے لیے ایک بار پھر پاکستانی فضائی حدود میں سفر کیا، تاہم انہوں نے سفارتی آداب کو خاطر میں نہ لاتے ہوئے پاکستان حکومت یا عوام کے لیے خیرسگالی کا کوئی پیغام نہیں چھوڑا۔
بھارتی وزیراعظم کا خصوصی طیارہ انڈیا ون لاہور کے قریب سے پاکستانی فضائی حدود میں داخل ہوا۔ مودی نے شیخوپورہ، حافظ آباد، چکوال اور کوہاٹ پر 34 ہزار فٹ کی بلندی پر سفر کیا۔ بھارتی ایئرفورس کا بوئنگ 777 طیارہ پارا چنار سے افغان فضائی حدود میں داخل ہوا۔ مودی کے طیارے نے تقریباً41 منٹ تک پاکستانی حدود میں سفر کیا۔
خیال رہے کہ افغانستان کی فضائی حدود بند ہے، تاہم بھارتی وزیراعظم کو خصوصی اجازت دی جاتی ہے۔