نئی دہلی: بھارت کے وزیراعظم نریندر مودی کی ذاتی ویب سائٹ کا ٹویٹر اکاؤنٹ ہیک کرلیا گیا۔
بھارتی میڈیا کے مطابق وزیراعظم نریندر مودی کی ذاتی ویب سائٹ کا ٹویٹر اکاؤنٹ اور موبائل ایپ جمعرات کی صبح ہیک کی گئی، جس کی ٹویٹر کی جانب سے بھی تصدیق کی گئی ہے۔
بھارتی ذرائع ابلاغ کا کہنا ہے کہ ہیکرز نے مودی کے اکاؤنٹس سے ٹوئٹس بھی کیں، جن میں کرپٹو کرنسی کے ذریعے وزیراعظم ریلیف فنڈ میں چندہ دینے کی اپیل کی گئی۔
بھارتی وزیراعظم کا اکاؤنٹ ہیک ہونے پر ٹوئٹر کا کہنا ہے کہ اس معاملے کی فوری طور پر تحقیقات کی جارہی ہیں اور اکاؤنٹ کو محفوظ بنانے کے لیے اقدامات کیے گئے ہیں۔
بھارت کے میڈیا کے مطابق مودی کی ذاتی ویب سائٹ کے ٹویٹر اکاؤنٹ ’نریندرمودی ڈاٹ اِن‘ کے 2.5 ملین فالوورز ہیں اور یہ اکاؤنٹ 2011 میں بنایا گیا تھا۔
