کراچی: گلشن اقبال کے علاقے نیپا چورنگی کے قریب کھلے مین ہول میں گرنے والے بچے ابراہیم کے والد کھلے مین ہولز کے ڈھکن لگانے کے لیے عملی طور پر سرگرم ہوگئے۔
ابراہیم کے والد نبیل گٹروں کے ڈھکن لگانے کے لیے تیزی سے سرگرداں ہیں اور جہاں جہاں اُنہیں کھلے گٹر نظر آرہے ہیں، وہ ان کو کور کررہے ہیں، تاکہ آئندہ اور کوئی معصوم گٹر میں گر کر اپنی زندگی سے محروم نہ ہوسکے۔
خیال رہے کہ سانحہ نیپا کے بعد بین الاقوامی میڈیا سے بات کرتے ہوئے ابراہیم کے والد نے روتے ہوئے کہا تھا کہ میں کس کو کیا کہوں؟ میرا بچہ تو چلا گیا، ان کے خلاف کون کارروائی کرے گا؟ کسی کو کرنی ہوتی تو وہ اس جگہ موجود ہوتے۔
ابراہیم کے والد کا کہنا تھا کہ میرا بچہ 14 سے 15 گھنٹے پانی میں رہا، اسے کوئی نکالنے نہیں آیا، حکومت سے کہوں گا کہ آپ لوگ گٹروں کے ڈھکن نہیں لگواسکتے تو میں یہ کام شروع کروں گا تاکہ کسی دوسرے بچے کی جان نہ جائے۔
ابراہیم کے والد نبیل کا کہنا تھا کہ میرا نمبر لکھ لیں، عوام مجھے فون کریں، ان کے گھر کے آگے کے گٹر اگر کھلے ہیں تو وہ ڈھکن میں لگواؤں گا۔
ابراہیم کے والد نے کہا، جتنے ڈپارٹمنٹل اسٹورز ہیں جن کے آگے گٹروں کے ڈھکن نہیں لگے، وہ سب جاکر میں لگواؤں گا۔
