لندن ہائیکورٹ: عادل راجا کیخلاف سابق آئی ایس آئی بریگیڈیئر ہتک عزت کا مقدمہ جیت گئے

لندن: لندن ہائیکورٹ میں بریگیڈیئر (ر) راشد نصیر نے یوٹیوبر عادل راجا کے خلاف ہتک عزت کا مقدمہ جیت لیا، جس کے مطابق عادل راجا کو ہرجانے اور عدالتی اخراجات کی مد میں 13 کروڑ روپے ادا کرنے ہوں گے۔
لندن ہائی کورٹ کے جج کا کہنا تھا کہ عادل راجا نے بریگیڈیئر (ر) راشد نصیر کو بدنام کیا اور ان پر جھوٹے الزامات لگائے، عادل راجا کو بریگیڈیئر (ر) راشد نصیر کو 50 ہزار پاؤنڈ ہرجانہ ادا کرنا ہوں گے۔
عدالت نے عادل راجا کو بریگیڈیئر (ر) راشد نصیر کو عدالتی اخرجات کے قریباً 3 لاکھ پاؤنڈ بھی دینے کا حکم دیا اور یہ احکامات بھی جاری کیے کہ عادل راجا اپنے تمام میڈیا پلیٹ فارمز پر راشد نصیر کے کیس جیتنے کی خبر دیں گے۔
خیال رہے کہ بریگیڈیئر ریٹائرڈ راشد نصیر نے 9 میڈیا آئٹمز کو ہتک آمیز قرار دے کر لندن ہائی کورٹ سے رجوع کیا تھا۔
جج رچرڈ اسپیئرمین نے تسلیم کیا کہ ان میڈیا آئٹمز سے بریگیڈیئر (ر) راشد نصیر کی شہرت کو نقصان پہنچا اور عادل راجا اُن پر لگائے گئے الزامات ثابت کرنے میں ناکام رہے۔