لاہور: اداکارہ لائبہ خان نے کہا ہے کہ وہ کسی سے بھی نفرت کی قائل نہیں جب کہ شادی کرکے شوبز چھوڑنا چاہتی ہیں۔
اداکارہ لائبہ خان نے نجی چینل کے ٹاک شو میں گفتگو کرتے ہوئے کہا کہ جب شوبز میں کام شروع کیا تھا تب ہی فیصلہ کرلیا تھا کہ اس شعبے میں 5 سال کام کروں گی اور پھر چھوڑ دوں گی۔ اب مجھے اداکاری کرتے ہوئے 5 سال ہوگئے اور کسی بھی وقت شوبز چھوڑ کر جاسکتی ہوں۔
انہوں نے کہا کہ میں اب شادی کرکے سیٹل ہونا چاہتی ہوں۔ ایسے شخص سے شادی کرنا چاہوں گی جو خود بھی میری عزت کرے اور اپنے گھر والوں سے بھی کروائے۔ ایک زمانے میں خوبصورتی متاثر کرتی تھی، لیکن اب پتا چل گیا کہ شادی کرنے کے لیے صرف خوبصورتی کا ہونا ہی کافی نہیں۔ اگر میں کسی کو پسند نہیں کرتی تو اس کے ساتھ کوئی رشتہ نہیں رکھوں گی۔ نفرت بھی ایک طرح کا رشتہ ہی ہوتا ہے اس لیے میں کسی سے نفرت کی قائل نہیں۔
