راولپنڈی: خیبر پختون خوا میں دہشت گردوں کے خلاف سیکیورٹی فورسز کے آپریشن کے دوران 17 خوارج مار دیے گئے۔
پاک فوج کے شعبہ تعلقات عامہ آئی ایس پی آر کے مطابق خیبر پختونخوا کے علاقے لکی مروت میں مُلا نذیر گروپ کے دہشت گردوں کی موجودگی کی اطلاعات پر 26 اور 27 ستمبر کو انٹیلی جنس بیسڈ آپریشن کیا گیا، آپریشن میں پاک فوج، اسپیشل سروسز گروپ اور سی ٹی ڈی نے حصہ لیا۔
آئی ایس پی آر کے مطابق سیکیورٹی فورسز نے خوارج کے ٹھکانے کو مؤثر انداز میں نشانہ بنایا، آپریشن میں بھارتی پراکسی یافتہ 17 خوارج جہنم واصل کردیے گئے۔
پاک فوج کے شعبہ تعلقات عامہ کا بتانا ہے کہ ہلاک خوارج سے اسلحہ اور گولا بارود بھی برآمد ہوا، ہلاک دہشت گرد سیکیورٹی فورسز، قانون نافذ کرنے والےاداروں کے خلاف دہشت گرد سرگرمیوں میں ملوث تھے۔
آئی ایس پی آر کے مطابق دہشت گرد معصوم شہریوں کے قتل سمیت کئی دہشت گرد سرگرمیوں میں بھی ملوث رہے تھے، کسی بھی دیگر بھارت نواز خارجی کے خاتمے کے لیے کلیئرنس آپریشن جاری ہے۔
شعبۂ تعلقات عامہ کا بتانا ہے کہ ملک سے بھارتی سرپرستی میں دہشت گردی کے ناسور کو جڑ سے اکھاڑ پھینکنے کے لیے پُرعزم ہیں۔
