ہانگ کانگ: ہالی وُڈ کے ہر دل عزیز اداکار جیکی چن بھی غزہ کے معصوم بچوں کی حالت زار پر آبدیدہ ہوگئے۔
جیکی چین کی حال ہی میں ایک ویڈیو وائرل ہوئی ہے جس میں وہ بتارہے ہیں کہ کیسے غزہ کے ایک بچے کی باتوں نے انہیں رُلا دیا۔
ان کا کہنا تھا کہ حال ہی میں ایک ویڈیو دیکھی، جیسے ہی میں نے اس بچے کو بات کرتے ہوئے سنا، میری آنکھوں میں آنسو آگئے۔
جب بچے سے پوچھا گیا کہ تم بڑے ہو کر کیا بنو گے؟ تو اس نے جواب دیا، ہماری طرف کے بچے بڑے نہیں ہوتے۔
جیکی چن نے کہا کہ یہ سن کر میری آنکھوں سے بے اختیار آنسو بہنے لگے۔ غزہ کے بچے روزانہ بم باری کا سامنا کررہے ہیں اور اس بچے کی بات میں کوئی جذباتی اظہار نہیں تھا۔
ان کے مطابق، بڑھاپا ایک خوشی ہے اور جب ایک بچہ یہ کہتا ہے کہ وہ کبھی بڑا نہیں ہوپائے گا، تو یہ انسان کے دل کو بہت تکلیف دیتا ہے۔
