کراچی: پاکستانی فلموں کی اداکارہ وینا ملک کی نئی وائرل تصاویر نے ان کے مداحوں کے ذہنوں میں نئے سوال کو جنم دے دیا۔
یہ کرکٹر صائم ایوب نہیں بلکہ وینا کے منیجر صائم ایوب کا تذکرہ ہورہا ہے۔
کیا وینا کے منیجر صائم ایوب صرف ان کے منیجر ہیں، یا وہ ان کے ’’خفیہ‘‘ بوائے فرینڈ بھی ہیں؟ سوشل میڈیا پر وائرل تصاویر میں وینا اور صائم کے درمیان قربت نے سب کو حیران کردیا ہے۔
چند دن پہلے وینا ملک نے انسٹاگرام پر کچھ تصاویر شیئرز کیں، جن میں وہ ایک نوجوان کے ساتھ بیٹھی نظر آرہی تھیں۔ ان تصاویر میں دونوں کا انداز اتنا دوستانہ تھا کہ یہ واضح ہورہا تھا کہ یہ شخص وینا کے قریبی حلقے سے تعلق رکھتا ہے۔ وینا نے پوسٹ کے کیپشن میں صرف ’’کومبو‘‘ لکھا، جس نے مداحوں کے درمیان قیاس آرائیوں کا ایک طوفان اٹھا دیا۔
بعد میں یہ بات سامنے آئی کہ وینا کے ساتھ نظر آنے والا نوجوان کوئی اور نہیں بلکہ ان کے منیجر صائم ایوب ہیں، لیکن صائم نے اپنے انسٹاگرام پر جو تصاویر شیئر کیں، انہوں نے تو سب کو ہلا کر رکھ دیا۔
تصاویر میں وینا اور صائم ایک کار میں بیٹھے ہوئے نظر آرہے ہیں، جہاں دونوں کے درمیان فاصلہ نہ ہونے کے برابر ہے۔ وینا کے ہاتھ میں سرخ گلاب اور ایک گلدستہ بھی ہے، جو محبت کی علامت سمجھا جا رہا ہے۔
سوشل میڈیا پر مداحوں نے ان تصاویر پر تبصرے کرتے ہوئے کہا کہ اگر صائم وینا کے بوائے فرینڈ ہیں، تو پھر شہریار چوہدری کہاں ہیں؟
خیال رہے کہ وینا نے گزشتہ سال شہریار چوہدری کے ساتھ اپنی نئی محبت کا اعتراف کیا تھا، لیکن ان کی شناخت کو ہمیشہ خفیہ رکھا۔ کچھ صارفین کا خیال ہے کہ شاید شہریار چوہدری ہی صائم ایوب ہیں اور وینا نے ان کا نام تبدیل کرکے بتایا تھا۔
واضح رہے کہ صائم ایوب پیشے کے اعتبار سے میوزک کمپوزر ہیں اور وینا کے ساتھ کئی میوزک ویڈیوز پر کام کرچکے ہیں۔ انہوں نے اپنے انسٹاگرام پر خود کو وینا کا منیجر لکھا ہوا ہے، لیکن ان کی تصاویر نے تو سب کو یہی سوچنے پر مجبور کردیا ہے یہ رشتہ صرف پیشہ ورانہ نہیں بلکہ اور بھی بہت کچھ ہے۔
وینا ملک، جو 2017 میں اپنے سابق شوہر اسد بشیر خٹک سے علیحدگی کے بعد اپنی ذاتی زندگی کو پرائیویٹ رکھنے کی کوشش کرتی رہی ہیں، اب ایک بار پھر چرچے میں ہیں۔