دبئی: پاکستان کرکٹ بورڈ اور بنگلا دیش کرکٹ بورڈ کے درمیان مذاکرات کامیاب ہوگئے۔ بنگلادیشی کرکٹ ٹیم سیریز کھیلنے پاکستان آنے پر رضامند ہوگئی۔
چیئرمین پی سی بی محسن نقوی اور بنگلا دیش کرکٹ بورڈ کے چیئرمین و صدر فاروق احمد کے درمیان طویل ملاقات کے بعد فیصلہ ہوا جس میں طے پایا کہ بنگلادیش کرکٹ ٹیم سیریز کھیلنے پاکستان کے دورے پر آئے گی۔
بنگلادیش اور پاکستان کے درمیان 3 ٹی ٹوئنٹی میچ کھیلے جائیں گے اور تینوں ہی لاہور میں ہوں گے۔
چیئرمین پی سی بی محسن نقوی نے دورۂ پاکستان فائنل کرنے پر بنگلادیش کرکٹ بورڈ کے چیئرمین و صدر سے اظہار تشکر کیا۔
ذرائع کے مطابق بھارتی پروپیگنڈے کے باعث بنگلادیش ٹیم کے کھلاڑیوں نے پہلے پاکستان نہ جانے کا فیصلہ کرلیا تھا، جس کے بعد محسن نقوی خصوصی طور پر ایک روزہ دورے پر دبئی پہنچے۔
محسن نقوی نے بنگلادیش کرکٹ بورڈ کے اعلیٰ عہدیداران سے ملاقاتیں کیں اورکئی گھنٹے طویل مذاکرات کے بعد چیئرمین پی سی بی نے بنگلادیش کرکٹ بورڈ کو پاکستان آنے پر قائل کیا۔
ذرائع کا بتانا ہے کہ پاکستان بنگلادیش سیریز کی تاریخوں کا اعلان ایک دو روز میں کیا جائے گا، سیریز طے ہوگئی ہے اور تاریخیں بھی جلد طے ہوجائیں گی۔